«Կարելի Է ՀՀ Ազգային Ժողովին ՄԷջ Սփիւռքի Համայնքներու Ներկայացուցիչներ Ընդգրկել». Վահագն Գարագաշեան

Անդրադառնալով ՀՀ սփիւռքի նախարար Մխիթար Հայրապետեանի  երկպալատ խորհրդարան ստեղծելու առաջարկին` Գանատայի «Հորիզոն» շաբաթաթերթի գլխաւոր խմբագիր Վահագն Գարագաշեան «Հայերն այսօր»-ի հետ զրոյցին ըսաւ , որ առաջարկին համահունչ` կարելի է նաեւ մէկ այլ տարբերակ նկատի ունենալ` Սփիւռքի համայնքներու ներկայացուցիչներ ընդգրկել ՀՀ Ազգային ժողովին մէջ:

«Ֆրանսան, Իտալիան, Փորթուկալը, Թունիսը, Խորուաթիան, Էքուատորը, Ալժիրը եւ այլ երկիրներ, որդեգրած են այս տարբերակը` իւրաքանչիւրն ընտրական իր յատուկ օրէնքներով: Օրինակ` 2011 թվականին, մէկ միլիոն հաշուող Թունիսի Սփիւռքն ուներ 18 պատգամաւոր` 217 պատգամաւոր ունեցող Ազգային Ժողովին մէջ, Ֆրանսայի Սփիւռքը` 12 պատգամաւոր` 331-ի համեմատ, Իտալիայինը` 12 պատգամաւոր` 630-ի համեմատ, Ալժիրինը` 8 պատգամաւոր` 389-ի համեմատ, Խորուաթիայինը` 6 պատգամաւոր `152-ի համեմատ, Էքուատորինը` 6 պատգամաւոր` 130-ի համեմատ»,- նշեց Վահագն Գարագաշեան` աւելցնելով, որ նման ընտրական օրէնքը Հայաստանի մէջ կրնայ յառաջացնել բազմաբնոյթ ընտրական հարցեր ու խնդիրներ` սկսած երկքաղաքացիութենէն մինչեւ սփիւռքեան համայնքներու ընտրական ձեւաչափին առնչուող հարցեր:

«Առաջին հերթին պէտք է յստակեցուի Սփիւռքի իւրաքանչիւր համայնքի մէջ ՀՀ քաղաքացիութիւն ունեցող հայերու թուաքանակը: Այնուհետեւ անհրաժեշտ է ճշդել, թէ իւրաքանչիւր երկիր կամ մայրացամաք քանի՞ պատգամաւոր իրաւունք ունի ընտրելու: Իտալիոյ պարագային ընդունուած է Սփիւռքի իտալացի պատգամաւորներուն բաշխել ըստ չորս աշխարհագրական տարածքներու` Եւրոպա, Հարաւային Ամերիկա, Հիւսիսային եւ Կեդրոնական Ամերիկա, Աֆրիկա, Ասիա եւ Ովկիանիա: Հետեւելով Իտալիոյ փորձին` Հայաստանի պարագային կարելի է աշխարհագրական տարածքները բաշխել հետեւեալ կերպ` Ռուսաստան եւ նախկին Խորհրդային երկիրներ, Ամերիկեան մայրացամաք, Մերձաւոր Արեւելք, Եւրոպա: Անշուշտ, վերոնշեալ առաջարկները ենթակայ են խորաթափանց քննարկման եւ վերլուծութեան»,-զրոյցն ամփոփեց Վահագն Գարագաշեան:

Scroll Up