«Պէտք Է Միշտ Փնտռել, Եւ Յաջողութիւնը Կը Ժպտի Ձեզի». Համոզուած Է Երիտասարդ Սուրիահայ Կին Ձեռներէցը

 Անժէլա Գրգեան ծնած է Հալէպ: Հայաստան  եկած է 4 տարի առաջ` մօրը հետ: Սուրիոյ մէջ մնացած են քոյրը, եղբայրը եւ հօրաքոյրը:

«Այնտեղ անոնք կ՛աշխատին, սեփական տուն ունին, ատոր համար կ՛ուզեն այնտեղ մնալ: Նաեւ այնտեղ աւելի բարձր է աշխատավարձը»,- կը նշէ Անժէլան: Հարազատները զինք տեղեկացուցած են, որ Հալէպի մէջ նախկինին պէս մարդիկ այլեւս չեն վախնար հրթիռներէն եւ պայթիւններէն, սակայն հսկայական են սոցիալական խնդիրները:

«Ամէն բանի գիները բարձրացած են, սակայն աշխատավարձը մնացած է մօտաւորապէս նոյնը, ինչ պատերազմէն առաջ էր: Նաեւ շատ մասնագէտներ, օրինակ` բժիշկներ, հեռացած են: Շատ հայեր ալ հեռացած են: Առաջուանը չէ այլեւս: Մինչեւ ե՞րբ, այլեւս հայ պիտի՞ չի մնայ այնտեղ, չեմ գիտեր` ինչպէս  պիտի ըլլայ վիճակը»,- կ՛ըսէ Գրգեանը:

Հայաստան գալէ յետոյ առաջին տարուան ընթացքին չէ աշխատած: «Մօտաւորապէս երկրորդ տարին էր, որ Կլոր սեղանը (Եկեղեցիներու համաշխարհային խորհուրդի (ԵՀԽ) հայաստանեան Կլոր սեղան հիմնադրամ) կազմակերպեց web design-ի դասընթացքը, որուն հետեւեցայ: Շատ լաւ էր, շատ արդիւնաւէտ: Սորվեցանք web design եւ code-եր գրել»,- կը յիշէ Գրգեան:  Ան  մինչեւ դասընթացին մասնակցիլը  ձեւաւորումով արդէն զբաղուած է` Սուրիոյ մէջ ստացած է ձեւաւորողի կրթութիւն: Համացանցի  կայքերու պատրաստումը եւ code-երու լեզուները սորվելէ յետոյ Անժէլան սկսած է աշխատիլ որպէս անկախ մասնագէտ` աշխատելով հիմնականին մէջ տունէն:

Ճիշդ է, web design սորվիլն իրեն շատ  օգնած է, եւ ինք ատոր շնորհիւ աւելցուցած է սեփական եկամուտը, սակայն Անժէլան համոզուած է` պէտք է չսահմանափակուիլ միայն մէկ գործով, շարժուիլ առաջ եւ զարգանալ: «Արդէն մէկ տարի է, որ ձեռքի աշխատանքներ կ՛ընեմ: Քանի որ սա ալ կապ ունի իմ կրթութեան` արուեստի հետ, որոշեցի տարբեր իրեր նկարել: Ապակիի, փորսելէնի վրայ  նկարած եմ»,- կ՛ըսէ Անժէլան:

Անոր  հետ հանդիպեցանք սուրիահայերու համար ՀՀ սփիւռքի նախարարութեան կազմակերպած ցուցահանդէսին ընթացքին: Այնտեղ սուրիահայ երիտասարդ նկարիչ- web design-ը ներկայացուցած էր իր հեղինակային շարֆերու, կերամիկայի եւ յուշանուէրներու տեսականին: «Մէկ տարուան ընթացքին մասնակցած եմ մօտաւորապէս 12 ցուցահանդէսի: Լաւ է, վաճառք ալ կ՛ըլլայ: Նաեւ Ֆէյսպուքի մէջ  կը դնեմ աշխատանքներս, այս ճանապարհով եւս պատուէրներ կ՛ըլլան»,-կը  նշէ Անժէլան:

Բացի web design-ի դասընթացքէն, Անժէլան մասնակցած է նաեւ Կլոր սեղանի կազմակերպած ռուսերէնի դասընթացներուն: Կ՛ըսէ` շատ օգտակար էր. «Հայաստանի մէջ ռուսերէնը կ՛օգտագործեն ինչպէս մենք Սուրիոյ մէջ արաբերէնը կ՛օգտագործէինք: Դասախօսն ալ լաւ էր, խաղերու միջոցով կը բացատրէր, հեշտ էր սորվիլը»: Ռուսերէնն օգտագործած է նաեւ ծրագրաւորման դասընթացքի արդիւնքով ստացած գիտելիքն ու հմտութիւնները կիրառելուն` պատուիրատուներու հետ շփման համար, քանի որ անոնցմէ ոմանք եղած են ռուսախօս:

Սակայն խնդիրներ ալ կան: Անժէլայի խօսքով` որքան ալ սուրիահայերը  կամ միւսները Կլոր սեղանի կամ այլ կազմակերպութեան միջոցով դասընթացներ անցնին, միեւնոյնն է` վստահ չեն աշխատանք գտնելու հարցով: «Միշտ այստեղ գործատուները կը փնտռեն մասնագէտ մարդոց, որ իրենց հետ աշխատին: Ատիկա է պատճառը, որ մարդոց մէջ աշխատանք գտնելու եւ իրենց ապագայի հանդէպ անվստահութիւն կայ»,- իր եւ բազմաթիւ այլ սուրիահայերու փորձը կը կիսէ Անժէլա Գրգեան: Այդուամենայնիւ, ան չի յուսահատիր եւ կոչ կ՛ընէ անդադար փնտռելու եւ նոր հմտութիւններ ձեռք բերելու:

Դժուարութիւնները հիմնական ընկերային  են, կ՛ըսէ Անժէլան: «Ոչ միայն իմ, այլեւ միւս սուրիահայերուն համար դժուար է տան վարձը տալը, որովհետեւ ծախսերն ալ շատ են: Կայ նաեւ օրէնքներու իմացութեան խնդիր: Օրինակ` եթէ ոեւէ մէկը պիտի գրանցուի, ճիշդ օրէնքները պէտք է իմանայ, շատ են օրէնքները»,- կը նշէ երիտասարդ սուրիահայ գործարար կինը: Սակայն այդ բացն ինքը կը լրացնէ` տարբեր ժողովներ եւ խորհրդատուութիւններ այցելելով:

Հայաստանի մէջ մնալու ցանկութիւն ունի, կ՛ըսէ` միակ պատճառը, որ կրնայ իրեն դրդել մեկնիլ արտասահման, պիտի ըլլայ ցած աշխատավարձը: «Վաստակածը քիչ է, նոյնիսկ եթէ ֆրիլանս (freelance) պատուէրներ  բերեմ տուն եւ  տունէն աշխատիմ, ատիկա ալ  շատ քիչ է, գումարը քիչ է, բայց յոյսով եմ, որ երթալով աւելի կը գնահատեն web design-ի այս տեսակ աշխատանքները»,- կ՛ըսէ roundtable-act.am-ի զրուցակիցը:

Անժէլա Գրգեանի ստեղծագործութիւններուն կրնաք ծանօթանալ այցելելով անոր Ֆէյսպուքեան էջը: Ան նաեւ ունի Եութուպեան ալիք, ուր կը ներկայացնէ իր ձեռքի աշխատանքները:

Ալլա Սարգիսովա

Ծրագիրի պատասխանատու

Scroll Up