Թորոնթոյի ՄԷջ Կը Կայանայ Գէորգ Հաճեանի Համերգը

«Հայերն այսօր»-ի տեղեկացմամբ, ապրիլ 24-ին, ժամը` 20:00-ին, Թորոնթոյի Հայ երիտասարդական կեդրոնի Համազգային թատերասրահին մէջ (հասցէ` 55 Halcrown Place, Toronto) կը կայանայ Հայոց ցեղասպանութեան 103-րդ տարելիցի միջ-համայնքային հանդիսաւոր մենահամերգ, որուն ընթացքին ելոյթ կ’ունենայ կոմիտասեան դասական երգերու մեկնաբան Գէորգ Հաճեան: Երգիչին կը նուագակցի դաշնակահարուհի Թալին Կըլըպոզեան Արթինեան, ասմունքով հանդէս կու գայ Թամար Տոնապետեան Կուզուեան:

Կոմիտաս Վարդապետի խնկելի յիշատակին նուիրուած եւ Հայաստանի Առաջին Հանրապետութեան 100-ամեակին ձօնուած համերգի կազմակերպիչը Թորոնթոյի միջ-յարանուանական մարմինն է` հովանաւորութեամբ Գերաշնորհ Տէր Բաբգէն արքեպիսկոպոս Չարեանի եւ Գերաշնորհ Տէր Աբգար եպիսկոպոս Յովակիմեանի եւ նախագահութեամբ տէր եւ տիկին Վահէ եւ Հռիփսիմէ Թոքմաքջեաններու:

Մենահամերգի աւարտէն ետք ծաղկեպսակ կը զետեղուի Հայոց ցեղասպանութեան 1,5 միլիոն սրբադասուած նահատակներու յիշատակին նուիրուած յուշակոթողին:

Համերգի մուտքն ազատ է:

 

Scroll Up