ԱՄՆ Մասաչուսէթս Նահանգի Քաղաքներուն Մէջ Հայոց Ցեղասպանութիւնը Փաստող Վահանակներ Տեղադրուած Են

Ինչպէս նախորդ 22 տարիներուն ընթացքին այս տարի նոյնպէս «Արուեստի խաղաղութիւնը» կազմակերպութիւնը www.peaceofart.org կը շարունակէ իր ամէնամեայ արշաւը` Հայոց ցեղասպանութեան 103-րդ տարելիցին ընդառաջ ԱՄՆ-ի Մասաչուսէթս նահանգի տարբեր քաղաքներու մէջ բարձրացնելով ելեկտրոնային վահանակներ, յարգելով բոլոր ցեղասպանութիւններու անմեղ զոհերու յիշատակը, միջազգային հանրութեան ներկայացնելով  20-րդ դարու առաջին ցեղասպանութեան` Հայոց Մեծ եղեռնի ողջ իրողութիւնը` որպէս անհերքելի պատմական փաստ` կոչ ընելով անոր միջազգային ճանաչման:

Ինչպէս «Հայերն այսօր»-ին կը յայտնէ Հեղինէ Գէորգեան, այս տարուան վահանակին վրայ պատկերուած է դատարկ եւ փշալարերով պատուած թռչնաբոյն, ուր դեռ կը մնան բռնի ուժով վտարուած թռչուններու փետուրները, ճիշդ այնպէս, ինչպէս հայ ժողովուրդը, որ օսմանեան կայսրութեան հրամանով ստիպուած եղաւ լքելու իր բնօրրանը ու բռնելու գաղթի, սովի, հալածանքի ու մահուան ճանապարհը:

«Վահանակը կը յիշեցնէ, որ Հայոց ցեղասպանութիւնը խլեց 1,5 միլիոն մարդու կեանք, իսկ 393,700 հայեր արտաքսուեցան իրենց բնակավայրերէն եւ դարձան գաղթականներ, ըլլալով գաղթականի զաւակ, գաղթականութեան մորմոքը կը զգամ խորապէս եւ առաւել կը ցաւիմ, որ այս հարցը այսօր ալ կը շարունակէ մնալ արդիական եւ միջազգային խնդիր: Սուրիոյ մէջ շարունակուող պատերազմի պատճառով բազմահազար քաղաքացիներ, ներառեալ հայեր կորսնցուցին իրենց կեանքը, ինչպէս նաեւ ստիպողաբար ձգելով իրենց բնօրրանը` բռնեցին գաղթի անյայտ ճանապարհը` վերադառնալու անյոյս երազանքով»,-իր խօսքին մէջ նշեց արուեստագէտ, «Արուեստի խաղաղութիւնը» կազմակերպութեան նախագահ Դանիէլ Վարուժան Հեճինեան:

 «Արուեստի խաղաղութիւնը» կազմակերպութիւնը 501(C)(3) անշահոյթ կրթական մարդասիրական կազմակերպութիւն է` ձօնուած աշխարհի խաղաղութեան պահապաններուն եւ իրագործողներուն, նաեւ անոնց, որոնք ունեցած են քաջութիւն իրենց կեանքը վտանգելու մարդկութեան բարօրութեան համար:

«Արուեստի խաղաղութիւնը» կազմակերպութիւնը կ’օգտագործէ համընդհանուր արուեստի լեզուն` իրազեկելու մարդկային գոյավիճակը` նպաստելով հակամարտութիւններու խաղաղ լուծման: Արուեստի խաղաղութիւնը» կազմակերպութիւնը կը ծառայեցնէ արուեստը յանուն խաղաղութեան եւ չունի որեւէ քաղաքական կամ կրօնական ուղղուածութիւն’ առանցք ունենալով Հայոց ցեղասպանութեան միջազգային ճանաչումը եւ Հայաստանի հեղինակութեան բարձրացումը արտերկրի մէջ:

 

 

Scroll Up