Ճարտարապետներու Եւ Ճարտարագէտներու Համահայկական 4-րդ Համաժողովին Ընդառաջ

Ապրիլ 13-ին Հրանոյշ Յակոբեան ընդունեց Ճարտարապետներու եւ ճարտարագէտներու համահայկական ընկերակցութեան համանախագահ Գոհար Թութունջեանը եւ գործադիր տնօրէն Արփինէ Դանիէլեանը:

Ողջունելով հիւրերը` Հրանոյշ Յակոբեան բարձր գնահատեց ընկերակցութեան ու անոր մասնաճիւղերու աշխատանքը եւ նշեց, որ դեռեւս 2009 թուականին նախարարութեան նախաձեռնութեամբ կազմակերպուած ճարտարապետներու համահայկական առաջին համաժողովը դարձաւ մասնագիտական քննարկումներու լուրջ հարթակ: Ան վստահութիւն յայտնեց, որ հոկտեմբերին կայանալիք Ճարտարապետներու եւ ճարտարագէտներու համահայկական չորրորդ համաժողովը  կ’ըլլայ առաւել կազմակերպուած եւ արդիւնաւէտ: Հրանոյշ Յակոբեան կարեւոր համարեց մասնագիտական հայրենադարձութեան խթանումը, մասնագիտական ցանցերու ստեղծումն ու ընդլայնումը, անոնց միջեւ սերտ համագործակցութիւնը, որ թոյլ կու տայ նպաստել եւ սեփակա՛ն մասնագիտական որակներու զարգացման, եւ՛ Հայրենիքի բարօրութեան:

Ընկերակցութեան համանախագահ Գոհար Թութունջեան ներկայացուց Արցախ աշխատանքային այցի արդիւնքները եւ նշեց, որ Արցախի մէջ կայանալիք Ճարտարապետներու եւ ճարտարագէտներու 4-րդ համաժողովի նախապատրաստական աշխատանքները համակարգելու համար հանդիպումներ  ունեցած է Արցախի Հանրապետութեան պետական նախարար Արայիկ Յարութիւնեանի, Քաղաքաշինութեան նախարար Կարէն Շահրամանեանի, ոլորտի շարք մը ներկայացուցիչներու հետ: «Հանդիպումներու ընթացքին կարեւորուեցաւ, որ համաժողովը նոր հնարաւորութիւն կը ստեղծէ Արցախի քաղաքաշինութեան ոլորտի զարգացման գործին մէջ համահայկական ներուժի արդիւնաւէտ օգտագործման, փորձի փոխանակման, մասնագիտական որակներու կատարելագործման համար: Այցի ընթացքին քննարկուեցան յառաջիկայ ընելիքները: Համաժողովի բացման հանդիսաւոր արարողութիւնը տեղի կ’ունենայ Երեւանի մէջ, այնուհետեւ տարբեր երկիրներէ պատուիրակութիւններն ու հիւրերը կը ժամանեն Արցախ, թեմատիկ նիստերը կ’ընթանան 5 ուղղութիւններով»,-նշեց Գոհար Թութունջեան:

Գործադիր տնօրէն Արփինէ Դանիէլեան աւելցուց, որ այցի ծիրէն ներս այցելած են նաեւ Շուշիի արհեստագիտական համալսարանը եւ հանդիպած տնօրէն Յովհաննէս Թոքմաջեանի հետ, ապա այցելած նաեւ «Եզնիկ Մոզեան» ուսումնարանը:

Հանդիպման աւարտին քննարկուեցան համաժողովի նախապատրաստական աշխատանքներուն առնչուող հարցեր, նախանշուեցան յետագայ ընելիքները:

Scroll Up