Սփիւռքի Նախարարութեան Նախաձեռնութեամբ Արցախի Մէջ Ճարտարապետներու Համահայկական Համաժողով Կ’իրականացուի

Արցախի Հանրապետութեան պետական նախարար Արայիկ Յարութիւնեան ապրիլ 12-ին ընդունած է Ճարտարապետներու եւ ճարտարագէտներու համահայկական ընկերակցութեան համանախագահ Գոհար Թութունջեանը եւ գործադիր տնօրէն Արփինէ Դանիէլեանը:

Արցախի կառավարութեան ֆէյսպուքեան պաշտօնական էջի փոխանցմամբ` Ա. Յարութիւնեան ողջունած է ՀՀ սփիւռքի նախարարութեան եւ Ճարտարապետներու ու ճարտարագէտներու համահայկական ընկերակցութեան կողմէ հոկտեմբերին Արցախի մէջ իրականացուելիք «Ճարտարապետներու եւ ճարտարագէտներու» համահայկական չորրորդ համաժողովի նախաձեռնութիւնը եւ յոյս  յայտնած, որ այն նոր հնարաւորութիւն պիտի ստեղծէ Արցախի քաղաքաշինութեան ոլորտի զարգացման գործին մէջ համահայկական ներուժի արդիւնաւէտ օգտագործման համար: Պետական նախարարը նշած է, որ վերջին տարիներուն Արցախի մէջ մեծ ծաւալի շինարարական աշխատանքներ  կ’ընթանան, եւ ուրախ կ’ըլլան, որ ճարտարապետական նախագծումներու հարցերուն մէջ իրենց մասնակցութիւնը բերէին նաեւ անուանի հայ ճարտարապետներ:

Հանդիպման ընթացքին զրուցակիցները մտքեր  փոխանակած են համաժողովի իրականացման եւ երկարաժամկէտ համագործակցութեան հետ կապուած հարցերու շուրջ:

Scroll Up