Ապխազիայէն Վերադարձած Ուսուցիչները Հիւրընկալուեցան Սփիւռքի Նախարարութեան ՄԷջ

Ապրիլ 12-ին Հրանոյշ Յակոբեան ընդունեց Ապխազիայէն վերադարձած ուսուցիչներ` Երեւանի Դ. Վարուժանի անուան հ. 89 հիմնական դպրոցի դասվար Քրիստինէ Մուշեղեանը եւ Պ. Եաւուրովի անուան հ. 131 հիմնական դպրոցի հայոց լեզուի եւ գրականութեան ուսուցչուհի Նաիրա Զաքարեանը, որոնք մարտ 23-էն ապրիլ 2 Ապխազիոյ Սուխում քաղաքին մէջ իրականացուցած են հայկական 25 դպրոցներու տարրական դասարաններու դասվարներու եւ հայոց լեզուի ու գրականութեան ուսուցիչներու վերապատրաստման ծրագիրը: Վերապատրաստման դասընթացներուն մասնակցած են  65 դասվար եւ հայոց լեզուի եւ գրականութեան 29 ուսուցիչ:

Ողջունելով հիւրերը` Հրանոյշ Յակոբեան շնորհակալութիւն յայտնեց կատարուած աշխատանքին համար, կարեւոր համարեց երիտասարդ սերունդի ազգային նկարագիրի, ինքնութեան պահպանութեան խնդիրները, ուսուցիչներու վերապատրաստումը, կրթական գործի ճիշդ կազմակերպումը համայնքներուն մէջ:

Նաիրա Զաքարեան շնորհակալութիւն յայտնեց ծրագիրին մասնակցելու հնարաւորութեան համար ու աւելցուց. «Այս կարեւոր նախաձեռնութիւնն իրականացուեցաւ ՀՀ Սփիւռքի նախարարութեան եւ Հայաստանի կրթական ոլորտի պատասխանատուներու համատեղ աշխատանքի, Ապխազիոյ հայկական համայնքի ղեկավար Գալուստ Տրապիզոնեանի եւ կրթութեան յանձնաժողովի նախագահ Խաչիկ Մինասեանի յամառ ջանքերու շնորհիւ: Հայ ըլլալը պատուաբեր է, հայ մնալը Սփիւռքի մէջ` հերոսութիւն: Հայապահպանութեան դժուարին գործը կ’իրականացուի նաեւ  հայկական պետական դպրոցները պահպանելով»:

Ուսուցիչները նշեցին, որ վերապատրաստման ծրագիրը խիստ անհրաժեշտ էր, եւ այն շարունակական դարձնելու կարիքը կայ : Գործուղման ընթացքին դպրոցներու քոյրացման յուշագիրներ ստորագրուեցան Երեւանի  Պեյո  Եաւորովի անուան № 131  հիմնական եւ  Սուխումի Յովհ. Թումանեանի անուան № 9, Երեւանի Դանիէլ Վարուժանի անուան № 89 եւ Գագրայի Խաչատուր Աբովեանի անուան № 3 դպրոցներուն միջեւ:

Անդրադարձ կատարուեցաւ դպրոցական ծրագիրներու, դասագիրքերու, ուսուցիչներու շարունակական վերապատրաստման հարցերուն:

 

 

Scroll Up