Հրանոյշ Յակոբեան Ընդունեց Թեհրանի Հայոց Թեմի Առաջնորդը

Ապրիլ 11-ին Հրանոյշ Յակոբեան ընդունեց Մեծի Տանն Կիլիկիոյ Կաթողիկոսութեան Թեհրանի Հայոց թեմի առաջնորդ Գերաշնորհ տէր Սեպուհ արք. Սարգիսեանը:

Հանդիպման ներկայ էր նաեւ իրանահայ հայրենադարձ Խաչիկ Խաչատուրեանը:

Ողջունելով Թեհրանի Հայոց թեմի առաջնորդը` Հրանոյշ Յակոբեան նշեց, որ մեծ երջանկութիւն է կրկին հանդիպիլ Հայ Առաքելական եկեղեցւոյ ամենակարկառուն ներկայացուցիչներէն մէկուն հետ: Հրանոյշ Յակոբեան ընդգծեց նաեւ, որ Իրանի հայ համայնքը կառչած է իր ինքնութեան, եւ յոյս յայտնեց, որ իրանահայ մեր հայրենակիցները աշխուժօրէն կը մասնակցին Սփիւռքի նախարարութեան 2018 թուականի ծրագիրներուն, մասնաւորապէս` «Իմ Հայաստան» փառատօնին, յուլիս 6-8 կայանալիք Համահայկական երիտասարդական հաւաքին, «Արի տուն» հայրենաճանաչութեան ծրագիրին:

Շնորհակալութիւն յայտնելով ջերմ ընդունելութեան համար` Գերաշնորհ տէր Սեպուհ արք. Սարգիսեան նշեց, որ համայնքը կը պատրաստուի Հայաստանի առաջին Հանրապետութեան հռչակման եւ Մայիսեան հերոսամարտերու 100-ամեակներու տօնակատարութիւններուն: «Շարք մը ձեռնարկներ ունինք, կը կազմակերպուին նաեւ  դասախօսութիւններ, հանդիպումներ: Երբ կը նայինք մեր պատմութեան ընթացքին, կրած դժուարութիւններուն, անհնար է չնկատել, որ միայն աստուածային հրաշքով  պայմանաւորուած է մեր գոյութիւնը, որ այսօր մենք կանք, կան ազատ, անկախ Հայաստանն ու Արցախը, կազմակերպուած Սփիւռքը: Մեր միակ փրկութիւնը հզօր Հայրենիքն է»,-նշեց Թեհրանի Հայոց թեմի առաջնորդը:

Scroll Up