Իրաքի Հայ Համայնքի Ներկայացուցիչներն Այցելեցին Սփիւռքի Նախարարութիւն

Ապրիլի 11-ին Հրանոյշ Յակոբեան ընդունեց Իրաքի հայ համայնքի ներկայացուցիչները` Ազգային Կեդրոնական վարչութեան ատենապետ Մելքոն Մելքոնեանի ուղեկցութեամբ: Հանդիպման մասնակցեցան Էրպիլի թաղական խորհուրդի եւ Հայ մշակութային ընկերակցութեան ատենապետ Յակոբ Սիմոնեան, Մուսուլի թաղական խորհուրդի ատենապետ Անդրանիկ Կիւլիւզեան, Զախոյի թաղական խորհուրդի ատենապետ Իշխան Սարգիսը, Հաւրէզք գիւղի թաղական խորհուրդի ատենապետ Խաչիկ Սաֆարեան, Քէրքուկ եւ Տըհոք քաղաքներու ատենապետեր Մասիս Սարգիսեան, Վարդգէս Սարգիսեան, Աւզրուկ գիւղի ատենապետ Պահրամ Պակոյեան:

Ողջունելով հիւրերը` Հրանոյշ Յակոբեան կարեւոր համարեց անոնց ազգանուէր եւ հայապահպան գործունէութիւնը, աշխոյժ մասնակցութիւնը սահմանապահ գիւղերուն աջակցելու ծրագիրին, նախանձախնդիր վերաբերմունքը կրթական, համայնքային եւ եկեղեցական հարցերու լուծման: Ան մասնաւորապէս նշեց. «Ուրախ եմ, որ համայնքը դժուարութիւններ յաղթահարելով, այնուամենայնիւ շարունակում է իր ակտիւ գործունէութիւնը, միասնական ու համախմբուած է: Հպարտութիւն եմ զգում ձեզ տեսնելով: Շնորհակալ եմ, որ սահմանամերձ Խաչիկ գիւղի հետ բարեկամութիւն էք սկսել, աջակցում էք ծառատունկի եւ ջրի զտման աշխատանքներին»:

Անդրադարձ կատարուեցաւ նաեւ Սփիւռքի նախարարութեան ծրագիրներուն համայնքի մասնակցութիւնն աշխուժացնելու հեռանկարներուն:

Հիւրերը շնորհակալութիւն յայտնեցին արդիւնաւէտ հանդիպման համար, ներկայացուցին համայնքին առջեւ ծառացած խնդիրները, մարտահրաւէրները, իրականացուցած աշխատանքներն ու յետագայ ծրագիրները:

Scroll Up