Մեծն Սարոյեանին Նուիրուած Ձեռնարկ Եկատէրինպուրկի ՄԷջ

Մարտ 11-ին Եկատէրինպուրկի հայկական կիրակնօրեայ դպրոցին մէջ կազմակերպուած է գրական ցերեկոյթ` «Վ.Սարոյեան. մարդ, հայրենասէր, բարի հսկայ» խորագիրով` նուիրուած Վ. Սարոյեանի ծննդեան 110-ամեակին: Կը  մասնակցէին դպրոցի աւագ եւ միջին խումբի սաները, որոնց շարքին կային նաեւ ռուսեր: Ներածական խօսքով հանդէս եկաւ հայոց լեզուի եւ գրա­կանութեան ուսուցչուհի Նաիրա Թորոսեան, ապա աշակերտները, մէկը միւսին շարունա­կե­լով, ներկայացուցին Հանճարեղ Հայու կեանքն ու գրական գործունէութիւնը: Հնչեցին Վ.Սա­րո­յեանի իմաստուն խօսքերը հայու, հայութեան եւ Հայաստանի մասին: Ուշագրաւ էր յատկապէս ձեռնարկի «Տեսիլք-հանդիպում» բաժինը, որ թա­տե­րականացուած երկխօսութիւն-ծա­նօթութիւն էր Մեծն արձակագիրին հետ: Վ.Սարոյեանի դերին մէջ յաջողութեամբ հանդէս եկաւ Գ. Յովհաննիսեան: Ձեռնարկին ժամանակ աշակերտները ներկայացուցին մեծերու խօսքերը Սարոյեանի մասին, ինչպէս նաեւ բեմադրեցին փոքրիկ դրուագ «Վեսլի Ճեքսոնի արկածները» վէպէն:  Ուսուցիչներ Նաիրա Թորոսեանի եւ Անահիտ Կարապետեանի մասնակցութեամբ ըն­թերցուեցաւ հանրայայտ «Հայ մուկը» պատմուածքը:  Ցերեկոյթն աւարտեցաւ «Քու կեանքի ժա­մերը» ստեղծագործութենէն որպէս պատգամ հնչող հետեւեալ խօսքերով, որոնք մշտա­պես արդիական են: «Կեանքիդ ժամերն ապրիր այնպէս, որ քեզի բաժին ինկած ժամերուն չա­ւե­լց­նես աշխարհի վիշտն ու տառապանքը, այլ ժպիտով ընդունես անոր անսահման լոյսն ու խորհուրդը»:

Ցերեկոյթն անցաւ ջերմ ու մտերմիկ գրական մթնոլորտի մէջ: Ներկայ էին ուսուցիչներ, ծնողներ, հիւրեր: Գնահատանքի խօսքով հանդէս եկան ծնողները եւ դպրոցի վաստակաշատ տնօրէն տիկին Այտա Մաթեւոսեան: Գրական ցերեկոյթներու մեկնարկը տրուած է:

Scroll Up