Տեառնընդառաջի Նախատօնակ Եւ Աւանդական Խարոյկի Հրավառում Քուէյթի Մէջ

Երեքշաբթի, 13 Փետրուարի երեկոյեան ժամը 6:30-ին, Սրբոց Վարդանանց նորակառոյց եկեղեցւոյս մէջ տեղի ունեցաւ Տեառնընդառաջի նախատօնակ, նախագահութեամբ՝ Թեմիս Բարեջան Առաջնորդ` Գերպ. Տ. Մասիս Ծ. Վրդ. Զօպույեանի, որ տեղի ունեցած երեկոյեան ժամերգութենէն եւ նախատօնակի արարողութենէն ետք համախմբուած հաւատացեալներուն օրուան խորհուրդը փոխանցեց, ըսելով.« Մատթէոս 5-ին մէջ կը կարդանք Քրիստոսի «Դուք էք աշխահի լոյսը» խօսքը: Քրիստոս խօսքը կ’ուղղէ բոլորիս, բոլորս լոյս անուանելով եւ լոյս ըլլալու շնորհքն ու պաշտօնը վստահելով մեզի», ու շարունակեց, ըսելով.« Աշխարհի լոյսը դառնալու քաղցր հրաւէրին ընդառաջած կ’ըլլանք, երբ ծառայական կեանքով եկեղեցւոյ պայծառացման նուիրական գործին մէջ մեր ամբողջական մասնակցութիւնը բերենք եւ երբ մեր ընտանիքները եւ տուները Քրիստոսով շողարձակուող լոյսի կեդրոններու վերածենք»: Առաջնորդ Հայր Սուրբը իր պատգամին մէջ նաեւ յորդորեց ներկաները հաւատքի մէջ անսասան մնալ եւ անվհատ աղօթել, օրինակ բերելով Սիմէոն Ծերունին եւ Աննա Մարգարէուհին, որոնք շուքի մէջ համեստ կեանք մը ապրեցան, ծառայեցին տաճարին, հաւատացին Աստուծոյ եւ յուսացին Փրկիչի գալուստին եւ երկինքէն ստացան իրենց արդար եւ իրաւ վարձատրութիւնը՝ թէկուզ ծերունազարդ տարիքին:
Այնուհետեւ, Քրիստոսի Լոյսը խորանէն փոխանցուեցաւ եւ տարածուեցաւ հաւատացեալներուն մէջ, երբ անոնք այդ լոյսով վառեցին իրենց լապտերները, ապա նորապսակ ամոլներ, Առաջնորդ Հայր Սուրբին եւ եկեղեցւոյ հոգեւոր հովիւ Տ. Արտակ Ա. Քհնյ. Քէհեաեանին առաջնորդութեամբ, դպրաց դասին հետ թափօր կազմած ուղղուեցան եկեղեցւոյ շրջափակ, ուր Հայր Սուրբին, Տէր Հօր եւ նորապսակ զոյգերու ձեռամբ տեղի ունեցաւ Տեառնընդառաջի աւանդական խարոյկի հրավառումը՝ եկեղեցիէն դուրս բերուած Քրիստոսի Լոյսով, եւ երգուեցաւ «Կիլիկիա» երգը:
Աւարտին, եկեղեցւոյ մէջ տեղի ունեցաւ նաեւ մանուկներու ընծայում:

Scroll Up