Իրանահայ Ճարտարագէտը Որոշած Է Հայաստանի Մէջ Ներդրումային Ծրագիրներ Իրականացնել

ԱՄՆ-ի մէջ բնակող իրանահայ ճարտարագէտ Արմէն Սագինեան «Հայերն այսօրի»-ի հետ զրոյցի ընթացքին ըսաւ, որ Հայաստան  եկած է ներդրումային երկու ծրագիր իրականացնելու նպատակով: Առաջին գաղափարը կը վերաբերի Իրանի սահմանին` Մեղրիի շրջակայքին, զուարճանքներու ընդգրկուն համալիր կառուցելուն` ժամանցի համար նախատեսուած բոլոր պայմաններով` ճաշարաններով, սրճարաններով, սինեմաներով յագեցած, նոյնիսկ հնարաւոր է համալսարան կառուցուի: Մարդիկ, այցելելով ինքնատիպ այդ «քաղաք», կը կարենան լիարժէք հանգստանալ ընկերներու կամ ընտանիքի հետ:

Յաջորդը կը վերաբերի Երեւանի մէջ աղբի թափօններու խնդրին: Ճարտարագէտը կ’առաջարկէ համապատասխան արհեստագիտութիւններ ունեցող յատուկ գործարան ստեղծել, ուր հնարաւոր կ’ըլլայ թափօնները վերամշակելէ յետոյ օգտակար եւ կարեւոր նիւթերն առանձնացնել` ատոնք յետագային շրջակայ միջավայրի մէջ կիրառելու համար:

 «Մեր առաջին ներդրումային նախաձեռնութեամբ կը ցանկանք խթանել Հայաստանի տնտեսութեան զարգացման, աշխատատեղերու բացման եւ զբօսաշրջութեան աշխուժացման, որուն միջոցով մեր պետութիւնը օտարազգիներու կողմէ աւելի ճանաչելի կը դառնայ»,-նշեց Արմէն Սագինեան` աւելցնելով, որ վերոնշեալ ծրագիրները պիտի փորձէ կեանքի կոչել գաղափարակից ընկերներու հետ` համատեղ ուժերով իրենց հնարաւորութիւններու սահմանին մէջ ապահովելով  Հայաստանի յառաջընթացը:

Արմէն Սագինեան այս առնչութեամբ տարաբնոյթ քննարկումներ  ունեցած է ՀՀ սփիւռքի նախարար Հրանոյշ Յակոբեանի, Երեւանի քաղաքապետ Տարօն Մարգարեանի եւ պաշտօնատար այլ անձանց հետ, որոնք պատրաստակամութիւն  յայտնած են աջակցելու ներդրումային ծրագիրներու իրականացման:

«Հոգիս կը խաղաղի այսպիսի ազգանպաստ գործունէութիւն սկսելու համար: Պէտք է մեզմէ իւրաքանչիւրն աշխոյժ  կերպով ներգրաւուած ըլլայ Հայրենիքի շէնացման գործին` ի շահ հայ ժողովուրդին: Յոյսով եմ` ամէն ինչ բարեյաջող ընթացք կ’ունենայ, եւ յառաջիկային կ’ազդարարենք մեր աշխատանքներու մեկնարկը»,- ընդգծեց Արմէն Սագինեան:

Աւելցնենք, որ Արմէն Սագինեան ծնած է 1933 թուականին` Թաւրիզ: Միջնակարգ դպրոցն աւարտելէ յետոյ տեղափոխուած է Թեհրան: Ծնողներու ամուսնալուծութենէն յետոյ երեխային խնամած է մայրը: Սակայն երկու տարեկան տղուն կեանքին նոր ծանր հարուած  բաժին կը հասնի. Կը մահանայ մայրը` անոր ձգելով տատիկի  դաստիարակութեան եւ հոգածութեան ներքոյ:

Այնուհետեւ Արմէն Սագինեան 1955թուականին կ’երթայ ԱՄՆ, ուր կ’աշխատի որպէս ֆերմեր (ագարակատէր), վարպետ, վարսավիր եւ ուսուցիչի օգնական:

Կ’ուսանի  Մերիւիլ քոլեջի մաթեմատիկայի բաժինին մէջ, Թենեսի համալսարանի մեքենական ճարտարագիտութեան բաժինին մէջ, ապա աւարտած  քալիֆորնիոյ համալսարանը:

Տարիներ շարունակ աշխատած է օդ-տիեզերք եւ հիւլէական ճարտարագիտութեան բնագաւառներուն մէջ` «Boeing» (1961-1963թթ.), «General Dynamics», «Rocketdyne» (1963թ.) եւ «Garrett-Air Research» (1965-1979) ընկերութիւններուն մէջ, 1998թուականին` «New Horizons»-ի գործադիր տնօրէն  եղած է:

Արմէն Սագինեանի ամենամեծ նախագիծը եղած է Իրանի 66 հազար գիւղերու համար նախատեսուած վերաբնակեցման` բարգաւաճման եւ վերանորոգման ծրագիրի ծիրէն ներս:

Կը տիրապետէ  շարք մը լեզուներու, կը զբաղի հետազօտական, թարգմանչական ու խմբագրական աշխատանքներով, գիրքերու հեղինակ է:

Գէորգ Չիչեան

 

 

 

Scroll Up