Հայկական Պար Եւ Երաժշտութիւն Սան Փաուլo Քաղաքի Միջազգային Օդակայանին ՄԷջ. տեսանիւթ

Սան Փաուլոյի «Գուարուլեոս» միջազգային օդակայանին մէջ  փետրուար 12-ին հնչած է հայկական երաժշտութիւն եւ կատարուած են հայկական պարեր: Այդպէս  ճանապարհած են հայաստանցի պարուսոյց Յովհաննէս Դաշտոյեանին Պրազիլի Համազգային հայ կրթական եւ մշակութային միութեան կից գործող «Կիլիկիա», «Արեւիկ» պարախումբի անդամները:

«Շատ տպաւորիչ ու անմոռանալի պահ էր, չէի սպասեր, որ պարախումբի անդամները նման անակնկալ կը մատուցեն: Շատ յագեցած եւ անմոռանալի օրեր  ունեցած եմ Պրազիլի մէջ, իսկ օդակայանին մէջ կատարուածը կարծես այդ ամէնուն եզրափակումն էր»,- «Հայերն այսօր»-ի հետ զրոյցին ըսաւ  Յովհաննէս Դաշտոյեան:

Աւելցնենք, որ պարուսոյց Յովհաննէս Դաշտոյեան Պրազիլ մեկնած էր  Սփիւռքի նախարարութեան աջակցութեամբ: Նախարարութեան «Կրթամշակութային աջակցութիւն հայ համայնքներուն (ԱՄՆ, Աւստրալիա)»-2017 ծրագիրի ծիրէն ներս 2017 թուականի դեկտեմբեր 20-էն մինչեւ 2018 թուականի փետրուար 12 Յովհաննէս Դաշտոյեան (վերջինս ՀՀ մշակոյթի վաստակաւոր գործիչ Գագիկ Գինոսեանի սաներէն է) այցելած էր Սան Փաուլօ քաղաք` Համազգային հայ կրթական եւ մշակութային միութեան կից գործող «Կիլիկիա», «Արեւիկ» պարախումբի անդամներուն վերապատրաստելու նպատակով:

 


Scroll Up