Այսօր Բոլորս Պէտք Ունինք Մեր Հաւատքի Զօրագլուխին. Բերիոյ Հայոց Թեմի Բարեջան Առաջնորդ

Հայաստանեայց Առաքելական եկեղեցին իր կրօնական եւ ազգային, դաստիարակչական ուսուցումներով, այլեւ իր ազգաբոյր տօներու եւ բարեպաշտական սովորութիւններու պահպանումով նոր աւիշ կը ներարկէ մեր ժողովուրդի զաւակներուն։

Այսպիսի կրօնական եւ ազգային սովորութիւններով հարուստ տօներէն մէկն է Տեառնընդառաջը, որ տօնացոյցին մէջ նշուած է որպէս տօն քառասնօրեայ գալստեան Քրիստոսի ի տաճարն եւ իբրեւ անշարժ տօն միշտ կը կատարուի 14 Փետրուարին։

Արդարեւ, հովանաւորութեամբ Բերիոյ Հայոց Թեմի Բարեջան Առաջնորդ Գերշ. Տէր Շահան Սրբ. Արք. Սարգիսեանի, Երեքշաբթի, 13 Փետրուար 2018-ի յետմիջօրէի ժամը 4:00-ին, Հալէպի Ս. Աստուածածին եկեղեցւոյ մէջ տեղի ունեցաւ Տեառնընդառաջի նախատօնակ, մասնակցութեամբ քահանայ հայրերուն եւ հաւատացեալներու հոծ բազմութեան, որոնք եկած էին իրենց մանուկներուն հետ, Քրիստոսի լոյսով ողողուելու եւ լուսաւորելու իրենց տունն ու ընտանիքը։
Սրբազան հայրը իր պատգամին մէջ ըսաւ.«Այսօր բոլորս, ամէն ժամանակէ աւելի, պէտք ունինք լոյս-Քրիստոսի ներկայութեան, որպէսզի իրեն մօտենանք, իր կամքը կատարենք, իրմով ջերմանանք, իրմով լուսաւորուինք, եւ իրմով կարենանք հեռացնել ամէն տեսակի աղտեղութիւն։ «Այսօր բոլորս պէտք ունինք մեր հաւատքի զօրագլուխին, որպէսզի իրմով զօրանանք եւ շարունակենք հայ քրիստոնէայի առաքելութիւնը»։

Առաջնորդ Սրբազան հայրը իր պատգամի աւարտին խորան բարձրացաւ ու խորանի կանթեղին լոյսով վառեց ատեանի սեղանին վրայ դրուած եռոտանի աշտանակին մոմերը, որմէ ետք ժողովուրդը խաղաղութեամբ արձակուեցաւ։

Այնուհետեւ մայրեր իրենց նորածին երեխաները եւ փոքրերը ընծայեցին Աստուծոյ Ս. խորանին առջեւ կանգնած քահանային, անոր օրհնութիւնը ստանալու համար։

Թող Տեառնընդառաջի ուրախութիւնն ու բերկրանքը ընդմիշտ ողողեն մեր էութիւնը եւ զօրացնեն մեր հաւատքը՝ դէպի Տէրը երթալու, իր պահպանութիւնը խնդրելու, իր լոյսին ներքեւ քալելու։

«Գանձասար»

27867148_1343093995792623_5446607264743818349_n

27972499_1343094185792604_1815204136616941207_n

27751962_1343093539126002_1107676452400150876_n

Scroll Up