Հրանդ Մաթեւոսեանի 83-ամեակին Նուիրուած Գրական Երեկոյ Թիֆլիսի Մէջ

Թիֆլիսի «Կովկասեան տուն» մշակութային կեդրոնին մէջ տեղի ունեցաւ հայ անուանի գրող Հրանդ Մաթեւոսեանի ծննդեան 83-ամեակին նուիրուած գրական երեկոյ, որուն իրենց մասնակցութիւնը բերին նաեւ Վրաստանի մէջ ՀՀ դեսպանութեան դիւանագէտները:

Ինչպէս «Հայերն այսօր»-ին կը յայտնեն Վրաստանի մէջ ՀՀ դեսպանութեան մամուլի ծառայութենէն, ձեռնարկին ներկայ էին հայ եւ վրացի հասարակական գործիչներ, գրողներ եւ թարգմանիչներ:

Երեկոյի պատուաւոր հիւրը` Հրանդ Մաթեւոսեանի ստեղծագործութիւններու վրացերէն լեզուով թարգմանիչ Զեզուա Մեդուլաշուիլին էր, որուն կողմէ քսաներրորդ դարու երկրոդ կէսին վրացերէն թարգմանուած եւ հրատարակուած են գրողի պատմուածքներու չորս ժողովածու:

Զեզուա Մեդուլաաշուիլին իր խօսքին մէջ նշեց. «Հրանդին գործերը շատ դժուար էր թարգմանել, նոյնիսկ երբեմն կը կատակէինք, որ այն արժէ նախ հայերէնէ աւելի հասկնալի հայերէնի թարգմանել: Կարդալն ալ  դժուար էր»:

Բանաստեղծ եւ թարգմանիչ Գիւի Շահնազարեան նշեց, որ եթէ շփում ունիս իրական գրականութեան հետ, ապա չկարդալ Մաթեւոսեան` անթոյլատրելի է:

Վրաստանի մէջ ՀՀ դեսպանութեան մամուլի խօսնակ Յարութիւն Հայրապետեան իր խօսքին մէջ շեշտեց, որ Հրանդ Մաթեւոսեան հայ գրականութեան ամենաերեւելի անհատներէն է, որուն «Աշնան արեւ» եւ «Մենք ենք մեր սարերը» ստեղծագործութիւնները, գիտէ ամէն հայ Հայաստանի եւ Հայկական սփիւռքի մէջ: Ան շնորհակալութիւն յայտնեց թարգմանիչ Զեզուա Մեդուլաշուիլին` Հրանդ Մաթեւոսեանի գործերը թարգմանելու եւ մաթեւոսեանական արուեստը վրացի ժողովուրդին աւելի հասանելի դարձնելու համար: Դիւանագէտին խօսքով Վրաստանի մէջ ՀՀ դեսպանութիւնը մշտապէս պատրաստ է աջակցելու Վրաստանի մէջ արուեստի ու գրականութեան հայ մեծերուն նուիրուած նմանօրինակ ձեռնարկներու կազմակերպման:

Տեղեկանք․ Եւրոպական «Հորիզոն» հիմնադրամի «Մշակոյթային օրացոյց» նախագիծով կը նախատեսուի նշել տարածաշրջանի տարբեր երկիրներու նշանակալից տարեթիւերը, ազգային տօները եւ ականաւոր գործիչներու ծննդեան եւ մահուան օրերը, «Կովկասեան տան»- մէջ կայացած երեկոն, որ նուիրուած էր ականաւոր հայ գրող Հրանդ Մաթեւոսեանի ծննդեան օրուան, կազմակերպուած էր այդ ծիրէն ներս :

«Կովկասեան տուն»-ը մտադիր է յաջորդ տարի վերստին լոյս ընծայել Հրանդ Մաթեւոսեանի պատմուածքներու լիակատար ժողովածուն, որուն մէջ տեղ կը գտնեն վրացերէնով արդէն հրատարակուած չորս ժողովածուներու մէջ զետեղուած գործերը:

 

Scroll Up