Դեսպան Մինասեան Այցելած Է Հայաստանին Նուիրուած Ցուցահանդէս Եւ Հանդիպած Հայ Համայնքի Ներկայացուցիչներուն

Փետրուար 8-10 Ռումանիոյ մէջ ՀՀ դեսպան Սերգէյ Մինասեան այցելեց Ռումանիոյ Քլուժ նահանգի Քլուժ-Նապոկա եւ Կեռլա (նախօրօք` Արմէնոպոլիս) քաղաքներ, ուր տեղի ունեցաւ  շարք մը հանդիպումներ եւ մասնակցեցաւ տարբեր ձեռնարկներու:

Ինչպէս «Հայերն այսօր»-ին կը յայտնեն ԱԳՆ մամուլի ծառայութենէն, փետրուար 8-ին Քլուժ-Նապոկայի արուեստի թանգարանին մէջ տեղի ունեցաւ Ռումանիոյ Հայոց միութեան տեղական մասնաճիւղի երկարամեայ ու անխոնջ նուիրեալ Միրչա Տիւադարի մեծարման ու պարգեւատրման արարողութիւնը, որուն կը մասնակցէին ՌՀՄ նախագահ Վարուժան Ոսկանեան, Քլուժի նահանգային խորհուրդի փոխնախագահ Իշտուան Վակարը, ՌՀՄ տեղական մասնաճիւղի նախագահ Կարէն Շեբեշին, Քլուժ-Նապոկա քաղաքի Պապեշ-Պոյայի համալսարանի Հայագիտութեան հիմնարկի տնօրէն, դոկտ. փրոֆ. Լուչիան Նաստասէ-Կովաչը, համայնքի եւ տեղական ԶԼՄ-ներու ներկայացուցիչներ:

Նոյն օրը դեսպան Մինասեան Քլուժի փոխնահանգապետ Իշտուան Վակարի հետ այցելեց Քլուժ նահանգի Արուեստի դպրոցին մէջ բացուած Հայաստանի մասին պատմող լուսանկարներու ցուցահանդէս:

Փետրուար 9-ին դեսպան Մինասեան հանդիպում ունեցաւ Պապեշ-Պոյայի համալսարանի տնօրէն, ակադեմիկոս, փրոֆ. Իոան-Աուրել Պոպի հետ` քննարկելով համալսարանի Հայագիտութեան հիմնարկի գործունէութեան աշխուժացման, այնտեղ հայոց լեզուի եւ պատմութեան դասընթացներու կազմակերպման, ԵՊՀ հետ համագործակցութեան աշխուժացման հնարաւորութիւնները: Զրուցակիցին ողջոյններ փոխանցելով ԵՊՀ տնօրէնի անունով` դեսպան Մինասեան տնօրէն Պոպին հրաւիրեց յաջորդ տարուան մայիսին այցելել Հայաստան` ԵՊՀ 100-ամեակին նուիրուած ձեռնարկներուն մասնակցելու նպատակով:

Քլուժի նահանգային խորհուրդին մէջ ՀՀ դեսպանը հանդիպում ունեցաւ փոխնահանգապետ Իշտուան Վակարի հետ` քննարկելով Ռումանիոյ Քլուժ նահանգի եւ Հայաստանի Արմաւիրի նահանգի միջեւ համագործակցութեան խորացման, տնտեսական ոլորտին մէջ ծրագիրներու իրականացման հնարաւորութիւնները, ներառեալ տեղեկատուական արհեստագիտութիւններու բնագաւառին մէջ:

Նոյն օրը ՀՀ դեսպանը հանդիպումներ ունեցաւ տեղական ձայնասփիւռի-հեռուստաընկերութիւններու ղեկավարներուն, ԶԼՄ-ներու ներկայացուցիչներուն հետ` քննարկելով հայաստանեան լրատուամիջոցներու հետ համագործակցութեան հնարաւոր հանգամանքները: ՀՀ դեսպանը TVR հեռուստաալիքին տուաւ ընդարձակ հարցազրոյց, որ եթեր կը հեռարձակուի օրերս: ՀՀ դեսպանը այցելեց նաեւ Թրանսիլվանիոյ Ազգագրական թանգարան, ուր աւանդաբար կը կազմակերպուին հայկական երեկոներ, ցուցահանդէսներ, տարբեր ձեռնարկներ եւ զրոյց ունեցաւ թանգարանի տնօրէն Թուդոր Սալաջեանի հետ:

Փետրուար 10-ին դեսպան Մինասեան այցելեց Կեռլա քաղաք, ուր հանդիպեցաւ տեղի հայ կաթոլիկ համայնքի ներկայացուցիչներուն, այցելեց Սուրբ Երրորդութեան հայ կաթողիկէ տաճար (1776թ.), որ կը համարուի աշխարհի մէջ ամենամեծ հայ կաթոլիկ տաճարը:

Կեռլայի մէջ Հայաստանի դեսպանը հանդիպում ունեցաւ քաղաքապետ Իոան Նեսելեանի հետ` քննարկելով Կեռլա եւ Հայաստանի Իջեւան քոյր-քաղաքներու միջեւ յետագայ համագործակցութեան ծաւալման հնարաւորութիւնները:

 

Scroll Up