Փոքր Հայաստանը Բազում Տաղանդներ Տուած Է Աշխարհին. «Կուլտուրա» Հեռուստաալիք

 Ռուսական «Կուլտուրա» հեռուստաալիքի «Ոտքով» հաղորդաշարը թողարկում պատրաստած է Երեւանի մասին` ներկայացնելով քաղաքի պատմութիւնը, ճարտարապետութիւնը, յուշարձանները, թանգարաններն ու տաղանդները:

«Փոքր Հայաստանը բազում տաղանդներ  տուած է աշխարհին: Մեզի յայտնի են հայ նկարիչները, դերասաններն ու երաժիշտները: Մոսկուայի մէջ կ’աշխատէր ճարտարապետ Հալաբեան, առաջնորդներուն կը նկարէր Նալբանդեան, մարդոց կ’ուրախացնէր ծաղրածու Ենգիբարովը, ֆիլմ կը նկարահանէր Քէոսայեան: Երաժշտութիւն կը գրէին Բաբաջանեանն ու Խաչատուրեանը, իսկ վերջինիս յուշարձանի հեղինակը Ֆրանգուլեանն է»,-այսպէս կը սկսի իր պատմութիւնը ծրագիրի հեղինակ եւ հաղորդավար Միխայիլ Ժեպրակը: Ան կ’աւելցնէ նաեւ, որ «Մեծ հայերը» թեմայով շրջագայութիւն կարելի է իրականացնել ոչ միայն Մոսկուայի, այլ նաեւ Փարիզի, Թիֆլիսի եւ Սան Ֆրանսիսքոյի մէջ:

Զբօսնելով Երեւանի փողոցներով` հեռուստահաղորդավարը կը պատմէ Երեւանը նախագծած Ալեքսանդր Թամանեանի մասին, կը շրջի Կասկադի մէջ եւ Հանրապետութեան հրապարակը, քաղաքի միւս տեսարժան վայրերը:

«Ոտքով… Ստեղծագործական Երեւան» թողարկման մէջ Ժեպրակ առանձին կը պատմէ նաեւ Մարտիրոս Սարեանի եւ Սերգէյ Փարաջանովի տուն-թանգարաններու մասին, իսկ հաղորդաշարի յաջորդ թողարկման մէջ, որ պիտի հեռարձակուի «Ռոսիա Կուլտուրա» հեռուստաալիքով փետրուար 18-ին, ան պիտի անդրադառնայ նաեւ քրիստոնեայ Հայաստանին, կը գրէ panarmenian.net-ը:

Scroll Up