Սրբոց Վարդանանց Զօրավարներու Յիշատակութեան Օր Լիբանանի ՄԷջ

Փետրուար 7-ին Պուրճ Համուտի «Յովհաննէս Պօղոսեան» թատերասրահին մէջ Տանն Կիլիկիոյ Հայ Կաթողիկէ Եկեղեցւոյ Սուրբ Փրկիչ եկեղեցւոյ ժողովրդապետութեան կողմէ կազմակերպուեցաւ Սուրբ Վարդանանց զօրավարներու յիշատակութեան օրուան նուիրուած ձեռնարկ:

Ինչպէս «Հայերն այսօր»-ին կը յայտնէ Լիբանանի մէջ հայ համայնքին հետ տարուող աշխատանքներու դիւանագէտ Վլադիմիր Պօղոսեան, ձեռնարկին ներկայ էին Լիբանանի պետական նախարար Ժան Օղասապեան, Պէյրութի պատրիարքական թեմի օգնական եպիսկոպոս Տէր Գէորգ եպիսկոպոս Ասատուրեան, հոգեւորականներ, Լիբանանի մէջ ՀՀ դեսպանութեան անձնակազմը, հայ համայնքի կրթական, մշակութային կառոյցներու ներկայացուցիչներ:

Հանդիսութեան ընթացքին իրենց կատարումներով հանդէս եկան Համազգային հայ կրթական եւ մշակութային միութեան «Տաւիղ» նուագախումբը, «Բլբուլ» եւ «Արծիւեան» երգչախումբերը, տուտուկահարներ Գէորգ Քեշիշեան, Նաթալի Աբոքեան եւ քանոնահարուհի Մարիա Եագուպեան:

Օրուան պատգամախօսն էր Լիբանանի մէջ ՀՀ դեսպան Սամուէլ Մկրտչեան: Դեսպան Մկրտչեան իր ելոյթին մէջ վճռորոշ որակեց Վարդանանց պատերազմը հայոց պատմութեան եւ մասնաւորապէս` հայ ժողովուրդի գոյատեւման յարատեւ պայքարին մէջ, եւ յատկապէս` պետականութեան կորուստի պայմաններուն: Քրիստոնէական հաւատքի եւ ինքնութեան պահպանման համար նահատակներու հերոսացումը դարձաւ ազգային ուղենիշ: Ինչպէս իր խօսքին մէջ ընդգծեց դեսպանը, Աւարայրի ճակատամարտի անկոտրում ոգին եւ միասնականութեան գիտակցութիւնը փոխանցուեցաւ յետագայ սերունդներուն, այն սերունդներուն, որոնք 1918 թուականին պէտք է կերտէին Սարդարապատի, Պաշ Ապարանի, Ղարաքիլիսայի հերոսական յաղթանակները եւ 1988 թուականին ոտքի ելլէին յանուն Արցախի ազատագրման:

Աւարտելով իր խօսքը` դեսպան Մկրտչեան նշեց, որ այս միասնական գիտակցութիւնը կրկին համախմբած է հայ ժողովուրդը` տօնելու Մայիսեան հերոսամարտերու 100-ամեակը եւ Արցախեան շարժման 30-ամեակը:

Scroll Up