Հայկական Մշակոյթի Օր Պէյրութի ՄԷջ

Լիբանանի մէջ ՀՀ դեսպանութեան եւ Պէյրութի Երիտասարդ կանանց քրիստոնէական ընկերակցութեան (ԵԿՔԱ, YWCA Beirut) համատեղ կազմակերպմամբ փետրուարի 7-ին Պէյրութի ԵԿՔԱ կեդրոնին մէջ տեղի ունեցաւ «Հայկական մշակոյթի օր» խորագիրով ձեռնարկ:

Ինչպէս «Հայերն այսօր»-ին կը յայտնէ Լիբանանի մէջ հայ համայնքին հետ տարուող աշխատանքներու դիւանագէտ Վլադիմիր Պօղոսեան, ներկայացուեցան Լիբանանի օգնութեան խաչի (ԼՕԽ) տիկնանց` Պատմական Հայաստանի տարբեր շրջաններուն բնորոշ զարդանախշերով ասեղնագործ աշխատանքները, ՀՀ վաստակաւոր արուեստագէտ Անատոլի Աւետեանի կտաւները, «Մայրիկ» ճաշարանին կողմէ պատրաստուած հայկական աւանդական ուտեստները:

Ձեռնարկին ընթացքին ելոյթներով հանդէս եկան ԵԿՔԱ նախագահ Ռոլա Էլ Խուրին եւ Լիբանանի մէջ ՀՀ դեսպան Սամուէլ Մկրտչեան: Դեսպան Մկրտչեան կարեւոր համարեց Լիբանանի բարեկամ ժողովուրդին` հայկական հարուստ մշակոյթը ներկայացնելու անհրաժեշտութիւնը, որ կը ծառայէ Լիբանանի եւ Հայաստանի ժողովուրդներու միջեւ կապերու ամրապնդման եւ փոխհարստացման: Դեսպանը ներկաներուն համառօտ ներկայացուց Հայաստանի մէջ քրիստոնէութեան տարածման, հայոց պատմութեան, հայ մշակոյթի մասին դրուագներ:

Ելոյթներուն յաջորդեցին Հայաստանի մասին պատմող վաւերագրական ֆիլմի ցուցադրութիւնը եւ լիբանանահայ տուտուկահար Գէորգ Քեշիշեանի կատարումները:

 

Scroll Up