Զուիցերիոյ Համադաշնութեան Ազգային Խորհուրդի Նախագահը Յարգանքի Տուրք Մատուցեց Հայոց Ցեղասպանութեան Զոհերու Յիշատակին

Զուիցերիոյ Համադաշնութեան Ազգային խորհուրդի նախագահ Տոմինիք տը Պիւմանի գլխաւորած պատուիրակութիւնը ՀՀ-ի մէջ Զուիցերիոյ դեսպան Լուքաս Կասսերի, ՀՀ ԱԺ պատգամաւոր Շիրակ Թորոսեանի ուղեկցութեամբ այցելեց Հայոց ցեղասպանութեան յուշահամալիր:

Ինչպէս «Հայերն այսօր»-ին կը յայտնեն Հայոց ցեղասպանութեան թանգարան-հիմնարկէն, Զուիցերիայէն ժամանած հիւրերուն ընդունեց ՀՑԹԻ տնօրէնի պաշտօնակատար Գէորգ Վարդանեան, եւ պատմեց յուշահամալիրի կառուցման պատմութիւնը, բացատրեց յուշակոթողի խորհրդանշական իմաստը: Զուիցերիոյ Համադաշնութեան Ազգային խորհուրդի նախագահ Տոմինիք տը Պիւմանը ծաղկեպսակ տեղադրեց յուշարձանին, ապա պատուիրակութեան անդամները ծաղիկներ խոնարհեցին Հայոց ցեղասպանութեան Սուրբ նահատակներու յիշատակը յաւերժացնող անմար կրակին մօտ եւ մէկ վայրկեան լռութեամբ յարգեցին անոնց յիշատակը:

Պատուիրակութեան անդամները այցելեցին նաեւ Հայոց ցեղասպանութեան թանգարան, ծանօթացան ցուցանմուշներուն, պարոն Տոմինիք տը Պիւմանը գրառում կատարեց Պատուաւոր հիւրերու յուշամատեանին մէջ, ուր մասնաւորապէս ըսուած է, որ տպաւորուած է Հայոց ցեղասպանութեան յուշահամալիր եւ թանգարան այցելութենէն, հպարտ է 2003թ. դեկտեմբեր 16-ի Զուիցերիոյ Համադաշնութեան Ազգային խորհուրդին կողմէ Հայոց ցեղասպանութեան ճանաչման օրինագիծին համար:

Յիշեցնենք, որ 2003թ. դեկտեմբեր 16-ին Զուիցերիոյ Համադաշնութեան Ազգային խորհուրդն ընդունած է Հայոց ցեղասպանութեան ճանաչման որոշում:

 

Scroll Up