Հայ Զինուորի Նամակը` Միսլատայի Հայկական Կիրակնօրեայ Դպրոցի Աշակերտներուն

Յունուար 28-ին իւրօրինակ դաս էր Միսլատայի (Վալենսիա) հայկական կիրակնօրեայ դպրոցին մէջ: Այն նուիրուած էր Հայոց բանակի կազմաւորման 26-ամեակին: Կրթօճախի սաները պատասխան նամակներ ստացած էին հայ զինուորներէն` այն նամակներու պատասխանները, որոնք աշակերտները գրած էին մէկ տարի առաջ` Հայոց յաղթանակած բանակի 25-ամեակին առիթով: «Սիրելի երեխանե՛ր, կը յիշէք, որ նամակներ  գրած էիք մեր զինուորներուն»,- հարցուց դպրոցի տնօրէն Արարատ Ղուկասեան: «Այո»,- հնչեց միահամուռ պատասխանը: «Եւ ահա, զինուորները պատասխանած են ձեզի»,- շարունակեց Ղուկասեան: «Այդքան ու՞շ  տեղ հասած են նամակները»,- հարցուց 8-ամեայ Մարիան: «Գիտե՞ս Հայաստանն որքան հեռու է: Ատոր համար ալ ուշ  հասած է»,- միջամտեց Սոնիան: «Գիտեմ,- պատասխանեց Մարիան,- ես եղած եմ Հայաստանի մէջ»: «Սիրելի երեխանե՛ր, մեր զինուորները շատ կարեւոր գործ կ’ընեն. կը պաշտպանեն մեր հայրենիքի սահմանները, որպէսզի մենք` բոլորս եւ մեր հայրենակիցները, Հայաստանի մէջ խաղաղ ապրինք: Ատոր համար ալ անոնց պատասխանը  քիչ մը ուշ  տեղ հասած է»,- բացատրեց ուսուցիչն ու պատրաստուեցաւ բանալու ծրարները:

Աշակերտներու ուրախութեան չափ չկար, երբ անոնք զգացին ու հասկցան, որ իրենց նամակները հասած են իրենց հասցէատիրոջը` Հայոց աշխարհի սահմանները պաշտպանող հայ զինուորին, որ, այս դժուարին օրերուն, նոյնիսկ ժամանակ  գտած է պատասխանելու իրենց նամակ-բարեմաղթանքներուն: Ռոմանը, Վալերիան, Վիկտորիան, Իզապելլան, Մարիան եւ միւսները  տեսակ մը ներքին ուրախութիւն  կ’ապրէին, երբ կը լսէին իրենց անունները: Ղուկասեան մէկ առ մէկ կարդաց զինուորներուն գրած պատասխան նամակները, ինչպէս նաեւ անոնց ուղերձը սփիւռքահայ ընկերոջը: Այս յատուկ դասաժամին ներկայ էին նաեւ աշակերտներու ծնողները, որոնք նոյնպէս մեծ գոհունակութեամբ ու յուզումով կը լսէին իրենց զաւակներուն ուղղուած նամակները:

Ստորեւ «Հայերն այսօր»-ը կը ներկայացնէ աշակերտներու եւ զինուորներու  քանի մը նամակներ.

Scroll Up