Բրիտանական BBC 3 Ձայնասփիւռը Անդրադարձած Է Վերֆելի «Մուսա Լերան 40 Օրը» Վէպին

Բրիտանական BBC 3 ձայնասփիւռը 50 վայրկեան տեւողութեամբ  փաստագրական հաղորդում  պատրաստած է աւստրիացի յայտնի գրող Ֆրանց Վերֆելի «Մուսա լերան 40 օրը» գիրքի մասին, որ հրատարակուած է 1933 թուականին:

«Հայերն այսօր»-ը, յղում կատարելով BBC 3 ձայնասփիւռի  կայք-էջին, կը նշէ, որ խօսելով գիրքին մէջ զարգացող դէպքերուն` Մուսալերան հերոսամարտի ու ֆրանսական նաւի միջոցով Եգիպտոսի Փորթ Սաիտ նաւահանգիստ հասած մուսալեռցիներու, ինչպէս նաեւ Հայոց ցեղասպանութեան եւ Թալէաթի սպանութեան մասին, հաղորդման հեղինակ, յոյն լրագրող Մարիա Մարգարոնիս կը նշէ, որ  վէպը ժամանակակից պատմութեան ամենաողբերգական դէպքերէն մէկն է, երբ Օսմանեան կայսրութիւնը որոշեց ամբողջովին ոչնչացնել հայկական ծագում ունեցող սեփական քաղաքացիները: Շարունակելով` Մարիա Մարգարոնիս կ’աւելցնէ, որ հայերու ճակատագիրը աշխոյժ քննարկուած է նաեւ տարիներ անց, երբ Գերմանիոյ մէջ իշխանութեան գլուխ  կանգնած է Ատոլֆ Հիթլերը:

Հեղինակը կը նշէ, որ Ֆրանց Վերֆելի եւ բազմաթիւ ընթերցողներու համար  «Մուսա լերան 40 օրը» գիրքը ո՛չ միայն հերոսապատում է հայ ժողովուրդի դիմադրութեան եւ գոյատեւման մասին, այլ նաեւ նախազգուշացում:

Երբ Աւստրիան կը միանայ Նազիստական Գերմանիոյ, գիրքը կը յայտնուի արգիլուածներու շարքին մէջ, իսկ 1938 թուականին Վերֆել կնոջ հետ ստիպուած կ’ըլլայ տարագրուիլ Ամերիկա:

Scroll Up