Հայ Զինուո՛ր, Երբեք Մի՛ Կորսնցեր Ժպիտդ, Ուրախութիւնդ Ու Ապրելու Ցանկութիւնդ. Սարատովի Հայկական Համայնքի Սաներ

Յունուար 21-ին Սարատովի հայ համայնքի հայոց լեզուի, պատմութեան եւ ազգա-մշակութային աւանդոյթներու արուեստանոցին մէջ տեղի ունեցաւ «Մեր բանակը» խորագիրով դասխօսութիւնը` նուիրուած Հայաստանի Հանրապետութեան զինուած ուժերուն, որուն ընթացքին  ունկնդիրները ծանօթացան Հայոց բանակի կազմաւորման պատմութեան, զինուած ուժերու ղեկավար կազմին ու կառուցուածքին, պատերազմական գործողութիւններու ու յաղթանակներու փառաւոր ուղիին: Հայ զինուորի  ու բանակի կեանքին  նուիրուած տեսանիւթերը ամբողջական դարձուցին ստացուած գիտելիքները: Նշենք, որ արուեստանոցի սաները կը մասնակցին Սփիւռքի նախարարութեան  «Նամակ հայ զինուորին» ծրագիրին եւ դասախօսութեան ընթացքին կարդացին զինուորներէն ստացած նամակները, որոնց մէջ մեր քաջ մարտիկները կը պատմեն իրենց առօրեայի, բանակի մէջ ծառայելու կարեւորութեան եւ հայրենիքի նկատմամբ ունեցած իրենց անսահման սիրոյ մասին: Արուեստանոցի ունկնդիրներուն համար ատիկա իսկական հայրենասիրութեան, տոկունութեան ու քաջասրտութեան դաս էր:

 Ահա թէ ինչ կը գրեն անոնք ` պատասխան նամակներուն մէջ.

«Նամակ անծանօթ հարազատէ:

Բարեւ՛, ի՛մ սիրելի հայ զինուոր: Ես Նաիրան եմ, քու հեռաւոր հայրենակցուհին Սարատով քաղաքէն: Ես կարդացի քու եւ քու ընկերներուդ  նամակները` մեծ յուզմունքով եւ արցունքն աչքերուս; Ճիշդ է, մենք կ’ապրինք հայրենիքէն հեռու, բայց հոգիով, մտքով ու սրտով  Հայաստանի մէջ ենք, ձե՛զի հետ ենք` մեր հայրենիքի պաշտպաններուն հետ:

Մենք հպարտ ենք, որ ձեզ պէս  հայրենիքի զինուորներ ունինք եւ գիտենք, որ որեւէ պահի դուք պատրաստ էք պայքարելու մեր երկրի ազատութեան ու անկախութեան համար: Իսկ մենք միշտ կ’ըլլանք ձեզի հետ: Սիրելի՛ հայ զինուոր, ես եւ իմ ընկերներս կը ցանականք քեզ քաջառողջութիւն, կանաչ ճանապարհ, եւ թո՛ղ Աստուած քեզ ու բոլոր զինուորներուն միշտ պահապան ըլլայ: Մենք գլուխ կը խոնարհենք այն քաջերու յիշատակին առջեւ, որոնք ինկած են մարտի դաշտին` մեր սահմանները պաշտպանելուն: Փա՜ռք ու պատիւ անոնց: Ես յոյս ունիմ, որ ալ  ոեւէ զինուոր զէնք պիտի չի բարձրացնէ արիւնահեղ մարտին ստիպուած մասնակցելու համար: Ես կ’ուզեմ, որ բոլորը ծառայութենէն անպայման վերադառնան տուն:

Քեզ բարի՛ ծառայութիւն, ի՛մ քաջ զինուոր:

Նաիրա Սրապիոնեան»:

***

«Բարեւ՛, ի՛մ հայ զինուոր`քաջ ու արի՛ արծիւ:

Ես ու իմ հասակակիցներս հեռաւոր Ոուսաստանէն, հպարտութեամբ եւ   երախտագիտութեամբ լեցուած, կ’ուզենք մեր ջերմ ու շնորհակալական խօսքը  յղել քեզ:

Դուն` ադամանդէ լեռներու` այդ յաւերժական սիւնի վրայ բարձրացած երկնասոյզ աշխարհի հզօր ու անպա՛րտ զաւակ, արժանի տէրն ես անոր` հայրենապաշտ ու անյաղթ:

Դո՛ւն, Վահագնատե՛ս զօրական, որ հայոց փիրուզէ լեռնաշխարհէն իջնող ամեհի հեղեղի զօրութեամբ կոփուած, գիտես պահել ու սրբօրէն պաշտպանել քու սուրբ հողդ,  օրհնուա՜ծ ըլլաս յաւէտ: Թո՛ղ քու բազուկդ միշտ ամուր ըլլայ, ուժդ` անսպառ: Թո՛ղ թշնամին միշտ սարսափի քեզմէ եւ հեռու երթայ մեր ազատ ու անկախ հայրենիքէն;

Մեր դիւցազնածի՛ն զինուոր, միշտ յիշէ՛, մենք` հայկական համայնքի ներկայացուցիչներս, կը սիրե՛նք քեզ, միշտ քեզ հե՛տ ենք, քու կողքի՛ն:

Հայ համայնքէն` Յասմիկ Ամբարդանեան:

***

«Բարեւ՛, հա՛յ զինուոր, ի՛մ քաջարի ու խիզախ եղբայր: Քեզ կը գրեմ հեռաւոր Սարատովէն: Ես ծնած ու մեծցած եմ այստեղ, բայց իմ սիրտս ու հոգիս Հայաստանի մէջ են:

Հիմա քեզի կը գրեմ հպարտութեամբ ու յուզմունքով: Հպարտ եմ, որ պատիւ ունիմ հաղորդակցուելու այն մարդուն հետ, որ այս պահուն, գտնուելով սահմանին, դիրքերուն, հեռաւոր զօրամասի մէջ, հարազատներէն հեռու, չընկճուիր ու վհատիր, այլ զգօն է, կը կատարէ իր գործը մեծ հմտութեամբ, ինչպէս վայել է հայ զինուորին: Գիտեմ, դժուարութիւններ կան, բայց երբ վերադառնաս տուն, այդ ամէնը պիտի դառնայ հպարտութեամբ պսակուած անցեալի վառ յիշողութիւն:

Իմացա՛ծ եղիր, ի՛մ սիրելի զինուոր, մենք, գտնուելով հայրենիքէն դուրս, չե՛նք մոռնար քեզի եւ քու ընկերներուդ: Մենք ձեզի հե՛տ ենք: Մենք ալ կը կազմենք մեր հայրենիքի ու բանակի  փոքրիկ մաս մը: Կը ցանկանք ձեզ դառն փորձութիւններէ զուրկ ծառայութիւն եւ բարի վերադարձ հայրական տուն, ուր ձեզի կը սպասեն ձեր հարազատներն ու սիրելիները, ձեր մշտարթուն մայրերը, որոնք ամէն վայրկեան կ’աղօթեն ձեզի համար ու կարօտած սրտով ու աչքով կը սպասեն ձեր  ճամբուն:

Խաղա՜ղ ծառայութիւն ու բարի՜ վերադարձ, ի՛մ հայ զինուոր:

Մերի Մխիթարեան»:

***

«Ողջո՜յն, Հայոց բանակի քա՛ջ զինուոր:

Դուն օր ու գիշեր կը պաշտպանես մեր սահմանը, մեր հողը, մեր հանգիստը, որ մենք լաւ սորվինք ու մեր հայրենիքին արժանի զաւակ  դառնանք: Շնորհակալ ենք անամպ, կապոյտ երկնքի համար, խաղաղ եւ ուրախ մանկութեան համար:

Կը ցանկանք շուտ վերադարձ տուն: Մենք կը հպարտանա՛նք ձեր մարտունակութեամբ, ուժով եւ քաջութեամբ:

Սոֆի Գասպարեան»:

***

«Բարեւ՛, սիրելի՛ զինուոր:

Կ’ըսեն` ռիսքը  գործի կէսն է, իսկ դուն, վտանգի ենթարկելով քու կեանքդ, կը պաշտպանես մեր սահմանները: Ուրեմն դուն վեհանձն մարդ ես: Ատոր համար ալ, ողջո՜յն, ի՛մ վեհանձն զինուոր:

Դուն կը ժպտի՞ս: Երեւի` այո: Ես յոյս ունիմ, որ դուն յաճախ կը  ժպտիս: Կը կարծեմ, դուն ատոր համար շատ պատճառներ կ’ունենաս: Հաւանաբար, ծառայութեան ժամանակ դուն ձեռք  բերած ես բազմաթիւ ընկերներ, իսկ աւելի ճիշդ` եղբայրներ: Դուք, հաւանաբար, իրար կու տաք ընտանեկան ջերմութիւն, հոգ կը տանիք մէկդ միւսին մասին: Վստա՛հ եմ, որ այդպէս ալ կ’ընէք:

Դո՛ւն, իմ վեհա՛նձն  զինուոր, կը ժպտիս նաեւ  մտածելով այն մարդոց մասին, որոնք  կը սիրեն ու կը սպասեն քեզ (հարազատներդ, ընկերներդ, բարեկամներդ, պարզապէս ծանօթներդ): Գիտե՞ս, ի՛մ զինուոր, որ դուն իսկակա՛ն հերոս ես: Իսկ հերոսներուն շատ կը վայլէ ժպիտը: Զինուո՛ր, երբեք մի՛ կորսնցներ ժպիտդ, մի՛ կորսնցներ ուրախութիւնդ ու ապրելու ցանկութիւնդ:

Ի՛մ վեհանձն զինուոր, ես այնպէ՜ս կ’ուզեմ, որ դուն մի՛շտ ըլլաս առողջ: Գիտեմ, որ դուն պատուով կը կատարես քու պարտքդ, կը պահպանես մեզ` բոլորս, մեր ապագան:

Խոստացի՛ր, ի՛մ բարեկամ, որ շուտով, վերադառնալով տուն, դուն կը շարունակես ուրախանալ կեանքով, ժպտիլ եւ ապրիլ: Եւ յիշէ՛, ի՛մ սիրելի, վեհա՛նձն, հարազա՛տ զինուոր, հերոսներու դէմքէն, անկախ ամէն ինչէն, երբեք պէտք չէ անհետանան ժպիտն ու երջանկութիւնը:

Բարի ցանկութիւններով` Սուետա Սրապիոնեան»:

***

«Բարեւնե՜ր հեռաւոր Սարատովէն: Ի՜մ սիրելի զինուոր, շնորհակալ եմ քեզի եւ քու զինակից ընկերներուդ մեր հայրենիքի սահմաններն անառիկ ու անսասան պահելու համար, մեր անդորրը պահպանելու եւ խաղաղ քուն ապահովելու համար: Ես հիմա կը գտնուիմ հայրենիքի սահմաններիէն դուրս, բայց իմ սիրտս ու միտքս Հայաստանի մէջ են: Ես հոգիով ու սրտով  միշտ ձեզի հետ եմ, կը հասկնամ, որ ծառայութիւնը դժուար է: Ցուրտէն ձեռքերդ երեւի սառած են, իսկ մութ գիշերին երբ քամին կը սուլէ, դուն կանգնած կը հսկես, որ խաղաղ լուսնայ Հայոց երկինքը: Գիտեմ, դուն հոգիով ուժեղ ես, արիասիրտ ու անձնուէր:

Ես կ’ուզեմ, որ աշխարհի մէջ խաղաղութիւն ըլլայ, որ ամէն մէկ զինուոր իր պարտքը հպաարտօրէն կատարած վերադառնայ հայրենի տուն, որ ոեւէ մօր աչք իր զինուորի ճամբուն չմնայ:

Ի՛մ հարազատներ, կը շնորհաւորեմ ձեզ հայոց յաղթանակած բանակի օրուան առթիւ,կը  ցանկամ խաղաղ երկինք, կանաչ ճանապարհ, անվտանգ ծառայութիւն եւ բարի վերադարձ:

Մենք ձեզ հե՛տ ենք, մե՛նք ալ մէկ մասնիկն ենք այդ հզօր բանակին ու  անկախ Հայաստանին: Տարածութիւնը ոչինչ է, եթէ  սիրտը, միտքն ու հոգին համախմբուած են:

Սփիւռքը ձեզ հե՛տ է:

Նելլի Մխիթարեան»:

***

Սիրելի՛ բարեկամներ, նիւթի վերջաւորութեան թոյլ տուէք Սարատովի մարզի հայ համայնքի անունով շնորհաւորել Հայոց փառապանծ բանակի տօնի կապակցութեամբ, մաղթել խաղաղ երկինք եւ բարի ծառայութիւն, ըսել հայ զինուորին` փառք քեզ հայրենիքի խիզա՛խ զաւակ, պաշտպա՛ն ու պահապան հայրենի հողի:

Կ’ուզենք նշել նաեւ, որ «Նամակ հայ զինուորին» ծրագիրը շարունակական է եւ շարքի առաջին ձեռնարկը տեղի  ունեցած է  Հայատանի Հանրապետութեան անկախութեան օրուան նախօրեակին ու նուիրուած էր մեզի համար պանծալի այդ տօնին:

Նիւթը պատրաստեց Նունէ Բարեղամեան

Աղբիւրը` «Հայերն այսօր»

Scroll Up