Վալանսի Հայ Մշակոյթի Տան Առօրեան Յագեցած Է Բազմապիսի Ձեռնարկներով

Յունուար  3-ին  խանդավառ մթնոլորտ  կը տիրէր Վալանսի մշակոյթի տան կամարներուն ներքոյ: Ծնողներ,  հիւրեր, աշխատակիցներ: Օրուան «հերոսներ»-ը հայ մշակոյթի տան մէջ գործող «Հայ  մշակոյթի   արուեստանոց»-ի մանուկներն էին` իրենց  բազմաբովանդակ ծրագիրներով:

Ինչպէս «Հայերն այսօր»-ին կը յայտնէ Վալանսի հայ մշակոյթի տան վարչութեան անդամ Սուսան Փահլեւանեան, «Կրթել մանուկը  օրօրոցէն». այս  նշանաբանով  կ’առաջնորդուին  աշխատակիցներ`  Ռոզի Սարեան, Լիւսի  Համամջեան, Սոնա  Ջանազեան, օգնականներ` Անահիտ  Մկրտչեան, Լիզա  Սարեան, Ժուլեայ Քիրազեան: Անոնք  մանուկներուն հետ կ’աշխատին փոխադարձ յարգանքի, փոխըմբռնման   մթնոլորտի մէջ: Աշխատանքի ընթացքին կը գտնեն մատուցման նոր ձեւեր, աշակերտներուն  զոյգերով եւ խումբերով սորվեցնելու, աշխատցնելու նոր հնարներ, եւ ուսուցողական պարագաներու օգնութեամբ կու տան այն  օգտակարն   ու  ուսանելին,  որ  անհրաժեշտ   է  Սփիւռքի մէջ  հասակ  առնող  մանուկին, որպէսզի սնուի հայեցի դաստիարակութեամբ, ծանօթանայ հայ  մշակոյթին  ու  արուեստին, հայոց  պատմութեան:

Հայ  մշակոյթի  տան  ատենապետ Նազօ Ջինբաշեանի պրպտող միտքը կը սահէր հեռուներ: Ան կը տեսնէր նոյն  այդ  մանուկը տարիներ յետոյ, որ հայ մշակոյթի  տուն  յաճախելով` կը ստանայ հայեցի դաստիարկութիւն եւ կառչած  կը մնայ  ազգային արմատներուն:

Հինգ տարի առաջ ծնաւ Վալանսի   հայ մշակոյթի  տան  կից  գործող «Մշակոյթի  արուեստանոց մանուկներու համար»-ը: Ուսումնական տարուայ  արձակուրդներուն մանուկները կը յաճախեն արուեստանոց: Կը մասնակցին 5-11  տարեկան  մանուկներ:  Իւրաքանչիւր օրուան համար կայ յստակ ժամանակացոյց: Այդ  կը վկայէ   դահլիճին մէջ  փակցուած   պաստառը,  որ  Ձեզի  կը պատմէ  մանուկներու  առօրեան:

Յունուար 3-ին  լեփ-լեցուն դահլիճի մէջ կը հնչէր երգն ու պարը, ծափն  ու ծիծաղը, ասմունքն ու խաղը, փոքրիկ «խոհարարները» ներկաներուն կը հիւրասիրէին  իրենց պատրաստած բլիթները: Մայրենին սփիւռքի մէջ  մեծցող  հայ մանուկի շրթունքներէն կը հնչէր վարժ ու սահուն առոգանութեամբ: Ներկաներու դէմքերուն  գոհունակութեան ժպիտ կը շողար:

Ձեռնարկի աւարտին ծնողները շնորհակալութիւն յայտնեցին աշխատակիցներուն, իսկ ատենապետ Նազօ Ջինբաշեանին ո՛չ միայն  ծնողները, այլ նաեւ հիւրերը իրենց երախտիքի խօսքը յղեցին այս բացառիկ ծրագիրի մտայղացման եւ կեանքի կոչելու համար:

Scroll Up