Ամանորի Տօնը «Հրանդ Տինք» Վարժարանին Մէջ

Ամանորեայ գեղեցիկ ու անաղարտ հեքիաթը իւրովի երանգ  ստացած էր «Հրանդ Տինք» վարժարանին մէջ: Վարժարանի տնօրէնուհի տիկին Հերիքնազ Աւագեանի շնորհաւորական խօսքէն ետք  սկսաւ տարուայ ամենահրավառ հանդէսը: Մանուկներու մաքուր երազներն ու տօնական տրամադրութիւնը, անոնց խինդն ու ծիծաղը, երգն ու պարը, ասմունքն ու խաղը, գոյնզգոյն ու փայլփլուն զգեստները, համեղ գաթայի բոյրը տարածուած էին ամէնուր:

Ինչպէս «Հայերն այսօր»-ին կը յայտնէ Լիլիթ Պօղոսեան, մանկապարտէզէն մինչեւ 5-րդ դասարանի աշակերտները մեծ պատասխանատուութեամբ ներկայացուցին  իրենց հանդէսը` արժանանալով ծնողներու եւ հարազատներու բուռն ծափահարութիւններուն: Աշակերտները ընթերցեցին Ձմեռ պապիկին ուղղուած իրենց նամակները: էտուարտը բարի պապիկէն մեծ ու նոր դպրոց կը խնդրէր, Արեւիկը` քոյր կամ եղբայր, միւսները` խաղաղութիւն աշխարհի բոլոր մանուկներուն համար, այնուամէնայնիւ գլխաւոր փափաքը հայրենիք վերադառնալն էր:

Ին՛չ Ամանորի հանդէս առանց նուէրներու: Երեխաներուն կողմէ սպասուած նուէրները չուշացան: Հոգաբարձուներ տէր եւ տիկին Հորոզօղլուները, ինչպէս նաեւ անոնց որդին` Կարօտը,  մեծ ոգեւորութեամբ աշակերտներուն բաժնեցին ամանորեայ նուէրները: Մինչ փոքրերը մեծ հետաքրքրութեամբ կը զննէին իրենց նուէրները, իսկ աւագ դասարաններու աշակերտները սկսած էին իրենց դիմակահանդէսը, անակնկալ հիւր եկան Կեդրոնական վարժարանի 10-րդ դասարանի սաները իրենց ուսուցիչներ`օրիորդ Լիզեթի եւ օրիորդ Թամարի առաջնորդութեամբ: Անոնք իրենց գեղեցիկ նուէրներով կրկնապատկեցին երեխաներու ուրախութիւնը: Մանկապարտէզի սաներուն սիրով ու մեծ հրճուանքով բաժնեցին  իրենց առած նուէրները, զրուցեցին երեխաներուն հետ, անոնց ուրախութեամբ ուրախացան:

Թող բարութիւնը թագաւորէ մեր սրտերը եւ Ամանորը սկսի մեծ սրտէ` դառնալով մեծ սէր, որ իրար հանդէպ կը տածենք ոչ միայն Ամանորին, այլ` ամէն օր:

Շնորհաւոր Ամանոր եւ Սուրբ Ծնունդ:

Scroll Up