Նռնօրհնէք Օդեսայի Սուրբ Գրիգոր Լուսաւորիչ Եկեղեցւոյ ՄԷջ

«Նռան պինդ կեղեւը մեր հաւատքի զօրաւոր վահանն է,

որի վրայ առկայ է հաւատքի թագը»:

Գրիգոր Տաթեւացի, Հայ Առաքելական Եկեղեցւոյ վարդապետ

Տարեմուտի նախաշեմին Օդեսայի Սուրբ Գրիգոր Լուսաւորիչ եկեղեցւոյ մէջ մատուցուեցաւ Սուրբ եւ Անմահ Պատարագ, որուն աւարտին հնչեց  «Վասն Հանրապետութեան Հայաստան աշխարհի» մաղթանքը: Տէր Աբգար քահանայ Գըլըճեան հայցեց, որ Հայր Աստուածն իր ամենազօր Աջով  խաղաղութեան ու բարօրութեան մէջ պահէ ու պահպանէ մեր երկիրն ու ժողովուրդը, յորդորեց` աղօթել նաեւ Ուքրանիոյ համար, որ օթեւանած է կէս միլիոն մեր հայրենակիցներուն:

Գոհաբանական մաղթանքէն յետոյ կատարուեցաւ նռան օրհնութեան կարգ, վասնզի այն արդէն դարձած է գեղեցիկ խորհուրդ կրող ծիսական աւանդոյթ եւ Գարեգին Բ.Ամենայն Հայոց Հայրապետի բարձր տնօրինութեամբ Տարեմուտի գիշերը ի կատար կ’ածուի հայոց բոլոր եկեղեցիներուն մէջ: Նռնօրհներքով կ’աւարտէ հին տարին եւ կը սկսի նորը:

Ինչպէս մեկնաբանեց Տէր Հայրը, նուռը որպէս անուշահամ բարիք, միշտ ալ հանդիսացած է հիւրասէր հայ օճախի սեղանի զարդը, սիրոյ ու հաւատքի զգացում առաջացուցած մարդոց հոգիներուն մէջ: Մեր ժողովուրդը   նուռին կը վերագրէ զանազան  բուժիչ յատկանիշներ:

«Թագակիր» միրգն իրաւացիօրէն կը համարուի պտուղներու արքան եւ իր տեսքով` գունային երանգներով, ձեւով, հատիկներու «ճարտարապետական» հետաքրքիր  կառուցուածքով պայմանաւորուած`  դեռեւս  վաղնջական ժամանակներէն  շատ ազգերու մօտ հարուստ ու ընդգրկուն նշանակութիւն ունի: Հայկական աւանդութեան մէջ,  իբրեւ ազգային խորհրդանիշ, նուռը կը կրէ կեանքի, ծաղկունքի եւ առատութեան իմաստը:

«Քրիստոնէական խորհրդաբանութեամբ` կարմիրը Քրիստոսի հեղած արեան գոյնն է, որմով մաքրագործուեցաւ, քաւութիւն տրուեցաւ մեր մեղքերուն, նռան հատիկները մենք ենք` քրիստոնեաներս,-շարունակեց հոգեւոր Հայրը: Իր ամբողջութեան մէջ նուռը հայ եկեղեցին է` իր բազմաթիւ հոտով: Այդ է պատճառը, որ նռան խորհրդաբանութիւնը հինէն ի վեր  մեծ կիրառում ունի հայկական մշակոյթի տարբեր ոլորտներուն մէջ, եկեղեցական ճարտարապետական արուեստի ու մանրանկարչութեան մէջ»:

Հաճոյքով ունկնդրելով քահանային` ակամայէն յիշեցի բանաստեղծի տողերը.

Ժայռից վանք կերտում, քարից նուռ տաշում,

Դարպասի աչքին յօնք-կամար քաշում…

Ծէսէն ետք ան օրհնեց ներկաներուն, կրկին շնորհաւորեց Ամանորը, եւ օրհնուած պտուղը բաժնուեցաւ հաւատաւոր ժողովուրդին:

Նարինէ Մուրատեան, քաղաք Օդեսա

Scroll Up