Ինծի Փոխանցուած Է Սիմոն Վրացեանի Հայրենասիրութիւնը, Խրոխտ Ոգին. Խուան Սարաֆեան

«Հայերն այսօր»-ը կը ներկայացնէ Արժանթինի հայկական համայնքի Հայ կեդրոնի նախագահ, Կառուցուածքային յարաբերութիւններու տնօրէն Խուան Սարաֆեանի հետ հարցազրոյցը:

Պարո՛ն Սարաֆեան, մեր զրոյցի առաջին պահէն ակնյայտ էր Ձեր ոգեւորութիւնը Հայաստան կատարած այցելութենէն: Կը պատմէ՞ք տպաւորութիւններուն մասին:

-Վաղեմի երազանքս վերջապէս կատարուեցաւ. այս տարի ամառը առաջին անգամ Հայաստան եկայ: Միշտ կը մտածէի գալու մասին, բայց աշխատանքային զբաղուածութեան պատճառով չէր յաջողեր: Արժանթինի մէջ հարազատներս ու ընկերներս կ’ըսէին, որ մեծ տպաւորութիւններով պիտի վերադառնամ, այդպէս ալ եղաւ:

Հիացայ Հայաստանի բնութեամբ, տեսարժան վայրերով, ժպտադէմ ու բարեհամբոյր մարդոցմով: Յառաջադէմ ու զարգացած պետութիւն տեսնելով` այնչափ ուրախացայ: Սակայն պէտք է աւելիին ձգտիլ եւ համախմբուած ուժերով աշխատելով` Հայաստանը աւելի լաւ դարձնել:

Ինչպէ՞ս որոշեցիք համայնքային գործունէութեամբ զբաղիլ:

-Արդէն տասներեք տարի է` համայնքային աշխատանքներ կը կատարեմ: Աւարտած եմ այն ժամանակ 700 աշակերտ ունեցող ՀՅԴ «Խրիմեան» կրթական հաստատութիւնը, որ  մեզի համար հայապահպանութեան լաւագոյն դարբնոցը դարձաւ: Եւ ատիկա միակ շարժառիթը չէր. Ինծի դասաւանդած է ՀՀ Առաջին Հանրապետութեան վարչապետ Սիմոն Վրացեանը: Անոր հայրենասիրութիւնը, խրոխտ ոգին ինծի փոխանցուեցաւ եւ որոշեցի ազգանպաստ գործունէութիւն ծաւալել` նուիրուելով Հայրենիքին օգտակար ըլլալու գաղափարին: Ահա այդպիսի մթնոլորտի մէջ  մեծցած եմ: Մանկութեանս տարիներէն սկսած` հայրենասիրական շունչը զգացած եմ նաեւ մեր տան մէջ:

Հինգ տարի է, որ Պուէնոս Այրէսի «Հայ կեդրոն»-ի ատենապետն եմ` երեք անգամ անընդմէջ ընտրուելով այս պաշտօնին: Ընտանիքիս անդամներն ալ «Հայ կեդրոն»-ի անդամներ  եղած են.  հայրս, մեծհայրերս եւս զբաղած են ազգանպաստ աշխատանքերով:

Այժմ խօսինք «Հայ կենդրոն»-ի մասին:

-Նախ ըսեմ, որ «Հայ կեդրոն»-ի հովանիին ներքոյ կը գործեն կրթական, երիտասարդական, բարեգործական, կանանց կազմակերպութիւններ, կ’իրականացուին համայնքային ձեռնարկներ: Սերտօրէն կ’աշխատինք Պուէնոս Այրէսի Հայ Առաքելական Սուրբ Գրիգոր Լուսաւորիչ եկեղեցւոյ հետ: Մեր ուշադրութեան կեդրոնին մէջ կը  պահենք յատկապէս արժանթինահայ երիտասարդներու ինքնութեան պահպանման  ու սեփական արմատներէն չհեռանալու հարցը: Բազմաբնոյթ ծրագիրներ կը կազմակերպենք, որոնց ծիրէն ներս Հայաստան կ’այցելեն, կը բացայայտեն տեսարժան, պատմամշակութային վայրերը, կը կապուին իրենց Հայրենիքին:

 Ի դէպ, երիտասարդները լի են հայրենասիրութեամբ, պարզապէս անհրաժեշտ է անոնց ուղղորդել ու աջակցիլ  : Անոնք կը մտածեն բարձրագոյն, որակեալ կրթութիւն ստանալու մասին, որպէսզի լաւ մարդ դառնան եւ օգտակար ըլլան Հայաստանին: Կը համագործակցինք նաեւ Արժանթինի մէջ ՀՀ դեսպանատան հետ:

Մէկ խօսքով, «Հայ կեդրոն»-ը կը փորձէ արժանթինահայերուն Հայաստանի շուրջ համախմբել:

Արժանթինահայ համայնքը հասարակական, մշակութային ինչպիսի՞ կեանքով  կ’ապրի:

-Միանշանակ կրնամ ըսել, որ արժանթինահայ համայնքը աչքի  կ’իյնայ համախմբուածութեամբ, նուիրեալ ու աշխատասէր մարդոցմով: Բոլորս մտահոգ ենք Հայաստանի ապագայով եւ կը փորձենք նպաստել մեր երկրի յառաջընթացին:

 Կը գործեն համահայկական կառոյցներ, աւանդական կուսակցութիւններու գրասենեակներ, հայկական պարախումբեր, ինչպէս նաեւ կը նշուին ազգային, եկեղեցական եւ պետական տօները: Մշակութային բազմապիսի ծրագիրներ  կ’իրականցուին` նպաստելով հայկական մշակոյթի պահպանման եւ այլազգիներու ծիրէն ներս հանրահռչակման:

 Համայնքի կենսունակութեան ու կանգուն մնալուն մեծապէս կը նպաստէ Հայաստանի հետ մշտական կապը: Հայապահպանութեան, արժանթինահայերուն եկեղեցւոյ շուրջ համախմբելու գործին մէջ համայնքէն ներս անուրանալի է Հայ Առաքելական եկեղեցւոյ եւ բարեխիղճ հոգեւորականներուն դերը:

Պարո՛ն Սարաֆեան, ՀՀ սփիւռքի նախարարութիւն-Աևժանթինի հայկական համայնք համագործակցութեան կամուրջը ի՞նչ հիմքերու վրայ կը գտնուի:

-Կը կարծեմ` ամուր հիմքերու վրայ, քանի որ աշխուժրէն կը մասնակցինք նախարարութեան կողմէ իրականացուող ծրագիրներուն: Յոյսով եմ` յետագային փոխգործակցութիւնը աւելի կ’ամրապնդուի:

Ամիսներ առաջ նախարար Հրանոյշ Յակոբեան աշխատանքային այցով Արժանթին եւ Պրազիլ եկած էր: Այցի ծիրէն ներս ան արժանթինահայ համայնքին մէջ տարբեր կառոյցներու ներկայացուցիչներու հետ արդիւնաւէտ հանդիպումներ ունեցաւ, մօտէն ծանօթացաւ առկայ մարտահրաւէրներուն` առաջարկելով բոլոր խնդիրներու լուծման համար երկուստեք աշխատանքի միջոցով ուղիներ գտնել: Նշեմ նաեւ, որ ՀՀ սփիւռքի նախարար Հրանոյշ Յակոբեան խանադավառեց մեզի, նմանօրինակ այցելութիւնները շատ կարեւոր են:

Գէորգ Չիչեան

 

Scroll Up