Կիպրոսի Ֆութպոլի Հաւաքականի Պատուիրակութեան Անդամները Այցելած Են Ծիծեռնակաբերդ

Կիպրոսի հաւաքականի ֆութպոլային պատուիրակութեան անդամներէն այսօր առաւօտեան այցելած են Ծիծեռնակաբերդ` յարգանքի տուրք մատուցելով Հայոց ցեղասպանութեան զոհերու յիշատակին:

Այս մասին կը յայտնէ երկրի ֆութպոլի ֆետերասիոնի մամուլի քարտուղարութիւնը:

«Կիպրոսի ֆութպոլային պատուիրակութեան անդամները այսօր կայանալիք խաղէն առաջ այցելած են 1915 թուականին Թուրքիոյ կողմէ իրականացուած Հայոց ցեղասպանութեան զոհերու յիշատակին նուիրուած յուշահամալիրը, ծաղիկներ դրած անմար կրակին մօտ` յարգանքի տուրք մատուցելով զոհերու յիշատակին:

Ծիծեռնակաբերդ  այցելած նաեւ Կիպրոսի ֆութպոլի ֆետերասիոնի փոխնախագահ Ֆոթիս Ֆոթիուն, տնտեսական գիծով ղեկավար Անտրէաս Մորիաս եւ ղեկավար այլ անձիք»,- կ’ըսուի Կիպրոսի ֆութպոլային միութեան տարածած հաղորդագրութեան մէջ:

Յիշեցնենք` Հայաստան-Կիպրոս ընկերական խաղը տեղի կ’ունենայ այսօր` նոյեմբեր 13-ին Վ. Սարգսեանի անուան «Հանրապետական» մարզադաշտին մէջ, որ կը մեկնարկէ ժամը 18:00-ին:

Scroll Up