Հայոց Բանակի Զինուորը Կալկաթայի Հայկական Եկեղեցւոյ Վարչութեան Աջակցութեամբ Անհրաժեշտ Բուժում Ստացած Է

Հոկտեմբեր 12-ին Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածինի մէջ ընդունեց 2016 թ. նոյեմբերին` ղարաբաղա-ատրպէյճանական զօրքերու շփման գիծին մարտական գործողութիւններու ժամանակ, ծանր վիրաւորում ստացած տասնապետ Գէորգ Դադասեանը` ուղեկցութեամբ ՀՀ ԶՈՒ հոգեւոր առաջնորդ Գերաշնորհ Տ. Վրթանէս եպիսկոպոս Աբրահամեանի: Այս մասին «Հայերն այսօր»-ին կը յայտնեն Մայր Աթոռ Ս. Էջմիածինի տեղեկատուական համակարգէն:

Վրթանէս եպիսկոպոսը Վեհափառ Հայրապետին տեղեկացուց, որ զինուորը, Նորին Սրբութեան օրհնութեամբ ամիսներ առաջ մեկնելով Հնդկաստան,  Կալկաթայի Ս. Նազարէթ հայկական եկեղեցւոյ վարչութեան աջակցութեամբ անհրաժեշտ բուժում  ստացած է:

Ամենայն Հայոց Կաթողիկոսը, իր օրհնութիւնն ու մաղթանքները բերելով քաջարի հայորդիին, նշեց, որ մեծ մխիթարութիւն է որեւէ կերպ զօրավիգ ըլլալ իրենց կեանքը հայրենիքին նուիրաբերած արիասիրտ զաւակներուն, որոնց ծառայութեամբ ապահով եւ անվտանգ կը պահուին հայրենեաց սահմանները: Վեհափառ Հայրապետը նշեց, որ Մայր Աթոռ Սուրբ Էջմիածինն այսուհետ եւս պիտի շարունակէ աջակցութիւն ցուցաբերել վիրաւոր զինուորներուն իրենց բուժման եւ ապաքինման հարցով:

Հանդիպման ներկայ էր Մայր Աթոռ Ս. Էջմիածինի Ընկերային ծառայութիւններու գրասենեակի տնօրէն Արժանապատիւ Տ. Մարկոս քահանայ Մանգասարեան:

 

 

Scroll Up