Թեհրանի Մէջ Կայացած Է «Իրանահայ Համայնքի Ամբողջական Պատմութիւնը» Գիրքի Շնորհանդէսը

Սեպտեմբեր 13-ի երեկոյեան Թեհրանի Հայ մարզամշակութային «Րաֆֆի» համալիրի «Սայաթ Նովա» սրահին մէջ տեղի ունեցաւ «Իրանահայ համայնքի ամբողջական պատմութիւնը» գիրքի շնորհանդէսը, որուն հեղինակն է գիտահետազօտող, հասարակական ու մշակութեային գործիչ դոկտ. Էտիկ Պաղտասարեանը` Է. Գերմանիկ:

Ինչպէս ««Հայերն այսօր»-ին կը յայտնեն Միութենէն, ձեռնարկը սկսաւ Համալիրի երգչախումբի` «Հայր Մեր»-ի կատարմամբ, որմէ յետոյ Համալիրի նախագահ Վիգէն Մանտանին հանդէս եկաւ բարի գալստեան ու ողջիւնի խօսքով: Այնուհետեւ ձեռնարկը իրականացնելու  նպատակով ան բեմ հրաւիրեց Համալիրի փոխնախագահ Ռուբիկ Սարտարեանը եւ գիրքի հեղինակ Էտիկ Պաղտասարեանը:

Դոկտ. Ռ. Սարտարեան դրուագներ պատմեց Դոկտ. Է. Գերմանիկի կեանքէն ու աշխատանքներէն: Ան նշեց, որ Է. Գերմանիկի առաջին գիրքը եղած է «Հայաստանի պատմութիւն» գիրքի թարգմանութիւնը` երկու հատորով, որ մեծ խանդավառութիւն յառաջացուց իրանահայութեան մէջ` ներկայացնելով Սովետական  Հայաստանի յայտնի պատմաբաններու գիրքի թարգմանութիւնը պարսկերէն: Ռ. Սարտարեան տեղեկացուց, որ շահի օրով Է. Գերմանիկը իր տարրական ուսումը ստացած է Հեշմաթիէ թաղամասի «Խորէնի» դպրոցին մէջ, որուն տնօրէնը յառաջդիմական մարդ  եղած է եւ իր դրական ազդեցութիւնը  ձգած բազմաթիւ մարդոց վրայ` ներառեալ նաեւ Էտիկ Պաղտասարեանի: Է. Պաղտասարեանի համար մեծ աղբիւր հանդիսացած է Ս. Աստուածածին եկեղեցւոյ դիմացի հայկական «Սագօ» գրախանութը, որ կրնար շահի բռնապետութեան օրօք Սովետական Հայաստանի գրականութիւնը ներմուծել Իրան եւ ծանօթացնել իրանահայ մտաւորականներուն Սովետական Հայաստանի գիտնականներու մօտեցումներու եւ ընդհանրապէս երկրի անցուդարձերուն հետ:

Այնուհետեւ ցուցադրուեցաւ 15 վայրկեաննոց  տեսաժապաւէն մը, ուր Է. Գերմանիկը կը ներկայացնէր իր հրատարակած ու թարգմանած գիրքերը, որոնց ընդհանուր քանակը 138-ն է` 98-ը պատմական, մշակութային, Հայոց ցեղասպանութեան մասին ու հասարակական բնոյթ ունեցող գիրքեր են, իսկ միւսները` արհեստագիտական ու աւելի շատ համակարգիչին վերաբերող:

Արտայայտուեցաւ նաեւ գիրքերու հեղինակ Է. Պաղտասարեան: Ան նշեց իր աշխատանքային պայմաններու ու տարբեր ժամանակներու հարցերու, ինչպէս նաեւ տարբեր երեւոյթներու նկատմամբ իր վերաբերմունքին մասին: Ընդգծեց այն դրդապատճառները, որոնք իրեն մղեցին այդ քանակութեամբ գիրքեր հրատարակելու: Ան խօսեցաւ նաեւ ապագայի ծրագիրներուն մասին: Ապրելով Գանատայի Թորոնթօ քաղաքին մէջ եւ ունենալով որոշակի հնարաւորութիւններ` ծրագրած է անգլերէն, հայերէն ու պարսկերէն պատրաստել  շարք մը աշխատութիւններ:

Գեղարուեստական բաժինին մէջ համալիրի երգչախումբը` գեղարուեստական ղեկավար Համլէթ Խաչատրեանի գլխաւորութեամբ կատարեց երեք երգ: Իր գեղեցիկ ասմունքով ներկայացաւ համալիրի մշակութային բաժանմունքի պատասխանատուներէն Մակտինէ Մինասեան:

Աւարտին  օրուան առթիւ արտայայտուեցաւ Իրանի մէջ ՀՀ արտակարգ եւ լիազօր դեսպան Պրն. Արտաշէս Թումանեան: Ան բարձր գնահատեց Է. Պաղտասարեանի կողմէ կատարուած աշխատանքները եւ անկեղծօրէն խոստովանեցաւ, որ տեղեակ չէ եղած նման աշխատութիւններու մասին: Ան իր խրախուսանքի խօսքը ուղղեց համալիրին եւ իրանահայ համայնքին:

Scroll Up