ՀՀ Սփիւռքի Նախարարութեան ՄԷջ Ամփոփուեցաւ «Արի Տուն-2017» Ծրագիրը

Հոկտեմբեր 4-ին ՀՀ սփիւռքի նախարարութեան մէջ նախարար Հրանոյշ Յակոբեանի ղեկավարութեամբ տեղի ունեցաւ «Արի տուն-2017» հայրենաճանաչութեան ծրագիրի ամփոփման նուիրուած խորհրդակցութիւն, որուն կը մասնակցէին նախարարի տեղակալ Սերժ Սրապիոնեան, աշխատակազմի ղեկավար Ֆիրդուս Զաքարեան, նախարարի խորհրդական Ստեփան Պետրոսեան, «Հայրենիք-Սփիւռք կեդրոն» ՊՈԱԿ-ի տնօրէն Դաւիթ Շահբազեան, նախարարութեան կառուցուածքային ստորաբաժանումներու ղեկավարները:

Քննարկուեցան «Արի տուն-2017» ծրագիրի իրականացման հետ կապուած հարցեր, վեր հանուեցան բոլոր ութ փուլերու  ընթացքին յառաջացած խնդիրները: ՀՀ սփիւռքի նախարարութեան համահայկական ծրագիրներու վարչութեան պետ Գագիկ Գեանջումեան ներկայացուց մասնակիցներու վիճակագրական ամփոփ պատկերը: Տարածաշրջանային ստորաբաժանումներու ղեկավարներն անդրադարձան իրենց տարածաշրջաններու մասնակցութեան:

Ամփոփելով քննարկման արդիւնքները` նախարար Հրանոյշ Յակոբեան ընդգծեց ծրագիրի կարեւորութիւնը սփիւռքահայ երիտասարդները  հայրենիքին հետ կապելու գործին: Կարեւոր համարուեցաւ նաեւ Հայոց լեզուի արագընթաց դասընթացքի եւ Ճամբարային օրերու առաւել արդիւնաւէտ օգտագործումը, հիւրընկալ ընտանիքներու մասնակցութիւնը ծրագիրին: Անդրադառնալով խնդիրներուն` նախարարը մատնանշեց ատոնք լուծելու ուղիները:

Խորհրդակցութեան աւարտին տրուեցան համապատասխան յանձնարարականներ:

Աւելցնենք, որ 2017 թուականին «Արի տուն» հայրենաճանաչութեան ծրագիրը հիւրընկալած է 36 երկրէ ժամանած 1047 սփիւռքահայ երիտասարդի:

Scroll Up