Սփիւռքի Նախարարն Ընդունեց «Հայկական Առեւտրային Ցանցի» Գործադիր Խորհուրդի Նախագահ Հրաչ Գասպարը Եւ Խորհուրդի Անդամ Վահրամ Փիրջանեանը

Հոկտեմբեր 4-ին ՀՀ սփիւռքի նախարար Հրանոյշ Յակոբեան ընդունեց «Հայկական առեւտրային ցանցի» գործադիր խորհուրդի նախագահ Հրաչ Գասպարը եւ խորհուրդի անդամ Վահրամ Փիրջանեանը:

Ողջունելով հիւրերը` նախարար Հրանոյշ Յակոբեան շնորհաւորեց Հրաչ Գասպարը «Հայկական առեւտրային ցանցի» գործադիր խորհուրդի նախագահի պաշտօնին ընտրուելու կապակցութեամբ, մաղթեց բեղմնաւոր, արդիւնաւէտ աշխատանք եւ յոյս յայտնեց, որ ան մեծապէս կը նպաստէ ամբողջ աշխարհի կարող ուժերու համախմբման տարբեր երկիրներու մէջ նոր առեւտրաարդիւնաբերական պալատներու ստեղծման, ատոնց ներգրաւման ՀԱՑ-ի աշխատանքներուն մէջ:

Նախարարն իր գոհունակութիւնը յայտնեց արդիւնաւէտ համագործակցութեան համար եւ բարձր գնահատեց սեպտեմբեր 19-ին «Հայաստան-Սփիւռք» համահայկական 6-րդ համաժողովի «Հայաստանի զարգացման հիմնախնդիրներ» ուղղութեան ծիրէն ներս տեղի ունեցած Հայկական առեւտրային ցանցի (ATN) 3-րդ գործարար ֆորումի պատշաճ կազմակերպումը: Նախարարը յոյս յայտնեց, որ կազմակերպութեան աշխոյժ գործունէութեան շնորհիւ հայկական սփիւռքի գործարար ներուժը առաւել  կը համախմբուի եւ  Հայաստանի մէջ կ’աւելնան ներդրումները:

Զրոյցի ընթացքին անդրադարձ կատարուեցաւ այս համաժողովին արծարծուած  խնդիրներուն` Հայաստանի տնտեսութեան զարգացման, ներդրումներու խթանման հնարաւորութիւններուն:

Քննարկուեցան «Հայկական առեւտրային ցանցի» ընդլայնման ուղղութեամբ իրականացուելիք աշխատանքները, կազմակերպական խնդիրները, տարբեր երկրներու մէջ գործող մասնաճիւղերը ցանցին մէջ ներգրաւելու մեքանիզմները:

Հիւրերը շնորհակալութիւն յայտնեցին ջերմ ընդունելութեան համար եւ նշեցին, որ «Հայաստան-Սփիւռք» համահայկական 6-րդ համաժողովը ծառայեց իր նպատակին,  իսկ  հայկական առեւտրային ցանցի (ATN) 3-րդ գործարար ֆորումը համաժողովի ծիրէն ներս կազմակերպելը առանձնայատուկ հնչեղութիւն հաղորդեց ձեռնարկին:

 

Scroll Up