Ամերիկահայ Իրաւաբանն Այցելեց Սփիւռքի Նախարարութիւն

Սեպտեմբեր 29-ին ՀՀ սփիւռքի նախարար Հրանոյշ Յակոբեան ընդունեց ԱՄՆ Կլենտելի իրաւաբանական խումբի հիմնադիր անդամ, «Միացեալ հայ երիտասարդներ» կազմակերպութեան նախագահ, իրաւագիտութեան դոկտոր Յարութիւն Յարութիւնեանը:

Ողջունելով հիւրը` սփիւռքի նախարարը կարեւոր նկատեց կազմակերպութեան աշխոյժ, ազգանպաստ գործունէութիւնը, նշեց, որ Հայաստան-Սփիւռք գործակցութեան զարգացման, ինչպէս նաեւ Հայոց ցեղասպանութեան ճանաչման եւ դատապարտման ուղղութեամբ կատարած բարեխիղճ եւ արդիւնաւէտ աշխատանքի համար արժանացած է ՀՀ սփիւռքի նախարարութեան շնորհակալագիրին:

Յարութիւն Յարութիւնեան շնորհակալութիւն յայտնեց բարձր գնահատանքի համար եւ ներկայացուց իր գլխաւորած` «Միացեալ հայ երիտասարդներ» կազմակերպութեան նպատակներն ու ծրագիրները: Ան նշեց, որ Հայ երիտասարդ մասնագէտներուն կողմէ ստեղծուած անկախ կազմակերպութիւնը նպատակ ունի բարձրաձայնել հայ երիտասարդը յուզող խնդիրները` ատոնց դրական լուծումներ տալու նպատակով: «Շուրջ 10 տարի կազմակերպութիւնը կը պայքարի Հայոց ցեղասպանութեան, ինչպէս նաեւ այլ ազգերու (Տարֆուր, Սուտան) դէմ տեղի ունեցած անարդարութիւններու ճանաչման համար: Կազմակերպութեան մէջ  ներգրաւուած են 500-է աւելի երիտասարդներ, որոնք իրենց ձայնը կը  բարձրացնեն բազմաթիւ կարեւոր խնդիրներու արդարացի լուծման, ինչպէս նաեւ մարդու իրաւունքներու պաշտպանութեան համար», – աւելցուց ամերիկահայ իրաւաբանը:

Քննարկուեցան յետագայ համագործակցութեան, նախարարութեան ծրագիրներուն կազմակերպութեան մասնակցութեան հետ կապուած հարցեր:

 

Scroll Up