Հայաստան-Սփիւռք Համաժողովին Ընդառաջ. Հայապահպանութեան Առաջնահերթ Խնդիրը Հայ Լեզուի Գոյատեւումն է. Գրիգոր Ամիրզայեան

Սեպտեմբեր 18-20 կայանալիք ՀայաստանՍփիւռք համահայկական 6-րդ համաժողովի ծիրէն ներս կը  ներկայացնենք «Հայերն այսօր»-ի հարցազրոյցը լրագրող, Ֆրանսայի «Արմէնիա» միութեան նախագահ Գրիգոր Ամիրզայեանի հետ:

 –Ձեր կարծիքով, ո՞րն է յառաջիկայ ՀայաստանՍփիւռք համահայկական 6-րդ համաժողովի առաջնահերթութիւնը:

– Հայաստան-Սփիւռք 6-րդ համահայկական համաժողովի առաջնահերթութիւնն այն է, որ Սփիւռքը եւ Հայաստանը միասնական արտայայտուին, համախմբուին, միեւնոյն ծրագիրներն իրականացնեն Հայաստանի Հանրապետութեան եւ Արցախի շուրջ: Անհրաժեշտ է նաեւ, որ Սփիւռքը Հայաստանին եւ Արցախին օգտակար ըլլայ գործնական կերպով (ֆինանսական, տնտեսական եւ այլն): Իսկ Հայաստան եւ Արցախ պէտք է օգնեն Սփիւռքին` հայկական շունչով գոյատեւելու, որպէսզի հայ լեզուն չկորչի 8 միլիոնանոց Սփիւռքին մէջ, որպէսզի հնարաւոր ըլլայ ամրապնդել Սփիւռք-Հայաստան կապերը:

 – Համաժողովի 4 թեմատիկ ուղղութիւններէն մէկը նուիրուած է հայապահպանութեան հիմնախնդիրներուն: Որ՞ն է Սփիւռքի մէջ հայապահպանութեան ամենամեծ հիմնախնդիրը եւ ինչ  պէ՞տք է ընել այդ ուղղութեամբ:

– Հայապահպանութեան առաջնահերթ խնդիրը հայ լեզուի գոյատեւումն է: Պայմանները շատ դժուար են: Եւրոպայի, Ամերիկայի, հաւանաբար նաեւ Ռուսաստանի մէջ, հայ լեզուն օր օրի կ´օտարանայ: Հայ նոր սերունդը հայերէն չի խօսիր, որ իմ կարծիքովս ձուլման առաջին նախանշանն է:

Երկրորդ խնդիրը Սփիւռքի մէջ հայկական կառոյցներու հայ պահելը, գոյատեւելն է: Անհրաժեշտ է աշխուժացնել Հայաստանի հետ կապերը, որպէսզի Սփիւռքի մէջ ապրողը իմանայ, որ այսօր կայ Հայաստան երկիր, Հայաստանի Հանրապետութիւն, որն իր տունն է: Կրնայ այցելել ու տեսնել զայն, վայելել եւ ինչու ոչ` մնալ ու ապրիլ:

 –Որո՞նք են այն կարեւոր նախադրեալները, որոնց միջոցով Սփիւռքի մէջ հնարաւոր է հայապահպանութեան ուղղուած աշխատանքներ իրականացնել` յատկապէս երիտասարդներու շրջանին մէջ:

– Իմ կարծիքովս առաջին պայմանը լեզուն է: Անհրաժեշտ է հայկական դպրոցներ կառուցել, Հայաստանէն գիրքեր ուղարկել: Սփիւռքի մէջ ապրող երիտասարդը պէտք է յաճախ Հայաստան այցելէ, հայկական միջավայրի եւ հայկական իրականութեան մէջ շփուելով` տեսնէ, որ հայ ազգը կ´ապրի, կայ եւ պիտի մնայ այս յարափոփոխ աշխարհի մէջ:

Ին՞չ ակնկալիքներ ունիք համաժողովէն:

 – Ակնկալութիւնս առաջին հերթին կապեր ստեղծելն է ` միջ-հայկական, Սփիւռք-Հայաստան եւ Սփիւռք-Սփիւռք: Կարեւոր է նաեւ տեսակէտներ փոխանակելը, փորձառութիւններով կիսուիլը, ինչպէս նաեւ նոյն ձեւով տեսնել Հայոց ապագան: Ըլլալ միասնական Հայաստանի եւ Սփիւռքի հիմնախնդիրներու շուրջ, որոնք են` Սփիւռքի մէջ հայապահպանութիւնը, Հայաստան եւ Արցախ Հանրապետութիւններու գոյատեւումը:

 

Scroll Up