Սփիւռքի Նախարարն Ընդունեց Մարսէլի Փոխքաղաքապետ Տիտիէ Փարաքեանը

Օգոստոս 28-ին ՀՀ սփիւռքի նախարար Հրանոյշ Յակոբեան ընդունեց Մարսէլի փոխքաղաքապետ, «Didier Parakian» նորաձեւութեան տան տնօրէն Տիտիէ Փարաքեանը եւ անոր ընտանիքի անդամները:

Նախարարը բարձր գնահատեց եւրոպական երկիրներու մէջ Հայաստանի եւ հայ ժողովուրդի անունը բարձր պահելուն ուղղուած Մարսէլի հայազգի փոխքաղաքապետի ջանքերը: Գերատեսչութեան ղեկավարը կարեւոր համարեց Հայաստանի բժշկական հիմնարկներուն բժշկական սարքաւորումներ տրամադրելու Փարաքեանի նախաձեռնութիւնը եւ աջակցութիւնը, որուն շնորհիւ Ֆրանսայի Կարմիր Խաչի կողմէ Հայաստանի Կարմիր Խաչին տրամադրուած գումարներով Գեղարքունիքի մարզին մէջ շուրջ 500 կանայք  հետազօտուեցան:

Նախարար Հրանոյշ Յակոբեան Տիտիէ Փարաքեանին յանձնեց «Մխիթար Գոշ» մետալը, որ Հանրապետութեան Նախագահը անոր շնորհած է Հայրենիք-Սփիւռք կապերու ամրապնդման, ինչպէս նաեւ հայապահպանութեան գործին մէջ ներդրած աւանդի համար:

«Մեծ հպարտութիւն է Սփիւռքում Ձեզ նման հայրենակից ունենալը: Դուք յաջողակ քաղաքական գործիչ էք, գործարար, լաւ հայ, լաւ զաւակ, հայր եւ ամուսին: Վերջին տարիներին Դուք ակտիւացրել էք կապերը Հայրենիքի հետ, – նշեց Սփիւռքի նախարարը` աւելցնելով,- Ձեր հովանաւորութեամբ վերանորոգւում է նաեւ Թալինի շրջանի Դաւթաշէն գիւղի հանրակրթական դպրոցը: Բարձր գնահատելով Ձեր գործունէութիւնը` Հանրապետութեան Նախագահը Ձեզ պարգեւատրել է «Մխիթար Գոշ» մետալով»:

Շնորհակալութիւն յայտնելով ջերմ ընդունելութեան համար` Ֆրանսայի մէջ հայազգի բարձրաստիճան պաշտօնեան շեշտեց, որ կրկնակի ուրախ է մետալը ստանալու նախարար Հրանոյշ Յակոբեանի ձեռքէն: «Այս մետալը կը նուիրեմ իմ ընտանիքիս, նախ եւ առաջ` մօրս, կնոջս եւ քրոջս, ապա` հօրս, զաւակներուս եւ Սփիւռքի ողջ հայութեան: Մենք շնորհակալ ենք Ձեզ եւ Ձեր նախարարութեան այն մեծածաւալ աշխատանքի համար, որ կ´իրականացնէք Հայրենիք-Սփիւռք կապերն առաւել մերձեցնելու ուղղութեամբ: Շուտով երեխաներս նոյնպէս կը դառնան 14 տարեկան եւ յոյսով եմ` անոնք ալ կը մասնակցին հիասքանչ «Արի տուն» ծրագիրին», – ընդգծեց Տիտիէ Փարաքեան:

Մարսէլի փոխքաղաքապետը նշեց, որ Սփիւռքը ուժ է Հայրենիքի համար, որն իր ուժը կը ստանայ միայն Հայաստանէն: «Ամէն անգամ մենք կու գանք Հայաստան` նախ եւ առաջ մեր նախնիներու հողէն լիցքաւորուելու, ուժ ստանալու համար, այստեղ հրաշագեղ հայերէնը սորվելու եւ մեր զաւակներուն փոխանցելու համար»,- ըսաւ Տիտիէ Փարաքեան:

Scroll Up