«Հայրենիքի Արեւն Աւելի Լաւ Կը Ջերմացնէ. «Արի Տուն» Ծրագիրի Մասնակից

Հայուհիի յատուկ գեղեցկութեամբ ու համեստութեամբ աչքի ինկող Ճուլիեթա Ստեփանեան «Արի տուն-2017» ծրագիրի 8-րդ փուլի ամենաաշխոյժ ու կենսախինդ մասնակիցներէն է: Եկած է Լաթվիոյ Ռիկա քաղաքէն: Թէեւ յաճախ կու գայ  Հայաստան, բայց ծրագիրին կը մասնակցի մեծ ոգեւորութեամբ:

«Արի տուն» ծրագիրին մասին իմացած եմ ընկերուհիէս, որ երկու տարի առաջ  մասնակցած էր ծրագիրին, ես ալ ընկերուհիիս`Աննային խորհուրդ տուի մասնակցելու, եւ մենք միասին եկանք Հայաստան: Ինծի համար շատ հետաքրքիր է հայրենիք այցելելը, այստեղ ձեռք  բերած եմ նոր ընկերներ»,-«Հայերն այսօր»-ի հետ զրոյցին ըսաւ Ճուլիեթան եւ աւելցուց, որ թէեւ հայկական դպրոց չէ յաճախած, հայերէն գրել, կարդալ սորված է ինքնուրոյն, որովհետեւ ընտանիքէն ներս շատ բարձր  դրուած է հայապահպանութեան խնդիրը: Տան մէջ կը խօսին միայն հայերէն, որուն համար շնորհակալ է ծնողներուն:

«Այստեղ մարդիկ շատ ջերմ են, նոյնիսկ անծանօթ մարդոց մէջ հարազատութիւն ու ջերմութիւն կը զգամ, բան մը, որ չեմ կրնար ըսել իմ ծննդավայրիս մասին: Այստեղ կարծես արեւն ալ այլ կերպ կը ջերմացնէ: Տեսարժան վայրերէն շատ հաւնեցայ Խոր Վիրապը, Գառնիի տաճարը, Նորավանքը: Վստահաբար կրնամ ըսել, որ ասիկա իմ կեանքիս լաւագոյն արձակուրդն էր, որուն համար այնչափ շնորհակալ եմ Սփիւռքի նախարարութեան»,-նշեց Ճուլիեթան:

Ռուզաննա Ալեքսանեան

 

 

Scroll Up