ՀՀ Սփիւռքի Նախարարը Քորտոպայի ՄԷջ.Աննկարագելի Էր Քորտոպահայութեան Ուրախութիւնը

Յունիս 1-ին ՀՀ սփիւռքի նախարար Հրանոյշ Յակոբեանի` Քորտոպա կատարած այցելութեան եւ հանդիպումներուն մասին «Հայերն այսօր» -ի հետ իր տպաւորութիւնները  կիսած է Քորտոպայի հայկական համայնքի նախագահ Էտուարտօ Թութուշեան:

«Յունիս 1-ին Քորտոպայի հայ համայնք այցելեց ՀՀ սփիւռքի նախարար Հրանոյշ Յակոբեան: Հայաստանի Հանրապետութեան անկախութենէն ի վեր` անցնող 26 տարիներուն ընթացքին, առաջին անգամ   մայր Հայրենիքէն նման բարձրաստիճան եւ պատուարժան հիւրի կ’ընդունէինք:

Բացառիկ ու աննկարագելի էր քորտոպահայութեան ուրախութիւնը: Սկիզբը ան հանդիպում ունեցաւ Քորտոպայի քաղաաքապետ Ռամոն Խաւիեր Մեսթրեյի հետ:  Նախարար Հրանոյշ Յակոբեան կարեւոր համարեց այդ հանդիպումը` նշելով, որ եկած է առաւել սերտ համագործակցելու ժամանակը:

Նախարարը քաղաքապետին հրաւիրեց Հայաստան` անձնամբ ճանչնալու եւ տեսնելու օրէ-օր զարգացող մեր երկիրը: Իր հերթին քաղաքապետը շեշտեց հայ համայնքին` քաղաքային կեանքին մէջ ունեցած դերն ու ձեռքբերումները:

Հանդիպումն աւարտեցաւ յուշանուէրներու փոխանակումներով: Հրանոյշ Յակոբեան հանդիպեցաւ նաեւ Քորտոպա նահանգի վարչապետ Խուան Գառլոս Մասեյինի հետ: Անոնք ջերմ մթնոլորտի մէջ քննարկեցին տարբեր ոլորտներու մէջ համատեղ գործակցութեան հնարաւորութիւններն ու հեռանկարները:

Խուան Գառլոս Մասեյին շեշտեց նահանգային կեանքին մէջ ունեցած  հայ համայնքին կարեւորութիւնը` ընդգծելով, որ հայ համայնքը հասարակական, մշակութային եւ այլ ոլորտներու մէջ մշտապէս աջակցած է նահանգային կեանքի բարելաւման եւ հանդէս  եկած կառուցողական նախաձեռնութիւններով: Ամենայուզիչ եւ տպաւորիչ մասը, թերեւս, հայկական դպրոցի ուսուցիչներուն եւ սաներուն հետ հանդիպումն էր:

Աշակերտները կարճ ժամանակուան մէջ փորձեցին ներկայացնել Մայրենիի իրենց գիտելիքները: Ասմունքէն եւ հայրենասիրական երգերէն յետոյ աշակերտներն իրենց անկեղծ բարեմաղթանքներով նամակները յանձնեցին նախարարին: Իր անմիջական զրոյցով Հրանոյշ Յակոբեան մանրամասն ծանօթացաւ Ս.Սահակ-Ս.Մեսրոպ ազգային վարժարանի հարուստ պատմութեան ու  ներկայիս խնդիրներուն:

Քորտոպայի հայութիւնը շնորհակալ է, որ Հրանոյշ Յակոբեան իր այցով լուծեց նաեւ դպրոցին մէջ գոյութիւն ունեցող դասագիրքերու խնդիրը:

Հայկական ակումբներ եւ Սբ. Գէորգ եկեղեցի այցելութիւնները ցոյց տուին, որ հեռաւոր Քորտոպա ապրող հայութիւնը կը շնչէ հայկականութեամբ: Հայ համայնքի ներկայացուցիչներն իրենց երախտագիտութեան խօսքն ըսին ՀՀ սփիւռքի նախարար Հրանոյշ Յակոբեանին` ակնկալելով, որ յաջորդ հանդիպումը  կը կայանայ Հայրենիքի մէջ»:

151

1617

18ff

 

Scroll Up