«Ցաւալի Պատմութիւններ. Դժուար Պատմելին Թանգարաններում» Խորագիրով Ձեռնարկներ Արցախի Մէջ

%d5%a1%d6%80%d6%81%d5%a1%d5%ad

Արցախի Հանրապետութեան մշակոյթի եւ երիտասարդութեան հարցերու նախարարութեան նախաձեռնութեամբ, «Ցաւալի պատմութիւններ. դժուար պատմելին թանգարաններում» խորագիրով, Արցախի բոլոր թանգարաններուն մէջ կազմակերպած է բազմաբնոյթ ձեռնարկներ` նուիրուած թանգարաններու միջազգային օրուան: Այս մասին կը հաղորդէ Artsakhpress.am-ը։

Ստեփանակերտի պետական պատմաերկրագիտական թանգարանին դիմաց՝ Արցախի շրջաններու թանգարաններու ներկայացուցիչները ցուցադրած են ձեռագործ աշխատանքներ, հնութիւններ, հայկական արժէքները ներկայացնող հազուագիւտ ցուցանմուշներ:

ԱՀ մշակոյթի եւ երիտասարդութեան հարցերու նախարարութեան մշակութային ժառանգութեան եւ ժողովրդական արհեստներու բաժինի պետ Երազիկ Դանիէլեան յայտնած է, որ Արցախի Հանրապետութեան թանգարանները ամէն տարի մեծ ոգեւորութեամբ կը մասնակցին տարբեր ձեռնարկներու: «Այս ձեռնարկներուն նպատակն է հանրութեան ներկայացնել այն բոլոր բռնութիւնները, որոնք գործադրուած են տարբեր ժամանակներու: Իսկապէս, անկախ այն բանէն, թէ որ ժամանակաշրջանին կ՝իրականացուի բռնութիւնը, այնուամենայնիւ, ատիկա մեզ համար կը մնայ ցաւոտ պատմութիւն եւ դժուար պատմելի թանգարաններու մէջ»,- նշած է Ե. Դանիէլեան եւ ընդգծած,- «Երկու անուանակարգով ցուցահանդէս նախապատրաստուած է` «Տատիս սնդուկը»` ուր պիտի ներկայացուին ձեռագործ աշխատանքներ, հնութիւններ, մեր ազգային արժէքները եւ Շուշիի թանգարանին մէջ կայանալիք «Իմ նախնիները» ցուցահանդէսը, ուր պիտի ցուցադրուին 80 տարուան լուսանկարներ:

Մարտակերտի թանգարանին մէջ ցուցադրուած է ապրիլեան պատերազմի բռնութիւնները, Մարտունիի մէջ` 60-ական թուականներուն բերդաշենցի փոքրիկ տղայի սպանութիւնը ատրպէյճանցիներուն կողմէ:

Թանգարանները բաց պիտի մնան Մայիս 18-20 մինչեւ ուշ երեկոյ, եւ այցելուները հնարաւորութիւն պիտի ունենան մէկ անգամ եւս ծանօթանալու մեր պատմութեան եւ ազգային արժէքներուն»:

Ե. Դանիէլեանի տեղեկութիւններով` ԱՀ մշակոյթի եւ երիտասարդութեան հարցերու նախարարութեան ենթակայութեան տակ կը գործէ 13 թանգարան` իրենց մասնաճիւղերով:

Նշենք, որ Մայիս 18-ը հռչակուած է իբրեւ թանգարաններու միջազգային օր 1977 թուականին` թանգարաններու միջազգային խորհուրդին որոշումով եւ անիկա կ՝եզրափակուի Մայիս 20-ին՝ «Թանգարաններու գիշեր» ձեռնարկով: