Մեկնարկեց «Հայաստանաբնակ Կարիքաւոր Սուրիահայերու Բժշկական Աջակցութիւն» Ծրագիրը

%d5%b6%d5%a1%d5%ad%d5%a1%d6%80%d5%a1%d6%80

Մարտ 17-ին Իզմիրլեան Բժշկական Կեդրոնին մէջ տեղի ունեցաւ «Հայաստանաբնակ կարիքաւոր սուրիահայերու բժշկական աջակցութիւն» ծրագիրի մեկնարկի եւ Համագործակցութեան յուշագիրի ստորագրման արարողութիւնը:

Ծրագիրի գործընկեր կառոյցներն են ՀՀ Սփիւռքի նախարարութիւնը, «Հայկական բարեգործական ընդհանուր միութիւն» հիմնադրամը Հայաստանի մէջ, «Սուրիահայերու հիմնախնդիրները համակարգող կեդրոն» հասարակական կազմակերպութիւնը, «Հալէպ» հայրենակցական բարեսիրական հասարակական կազմակերպութիւնը:

«Հայերն այսօր»-ի փոխանցմամբ` ողջոյնի խօսքով հանդէս եկաւ ՀՀ սփիւռքի նախարար Հրանոյշ Յակոբեան: Կարեւոր համարելով սուրիահայերու համար հերթական ծրագիրի մեկնարկը` ան մասնաւորապէս նշեց. «Ուզում եմ շնորհակալութիւն յայտնել «Հայաստանաբնակ կարիքաւոր սիրիահայերի բժշկական աջակցութիւն» ծրագրի գործընկեր կազմակերպութիւններին, յատկապէս Իզմիրլեան հիմնադրամի մարդասիրական կենտրոնին, որը Վեհափառի օրհնութեամբ պատրաստակամ է օգնել լուծելու սիրիահայերի բժշկական խնդիրները, նրանց համապատասխան բժշկական խորհրդատուութիւն եւ օգնութիւն տրամադրել: Մեր շատ սիրելի սիրիահայերի համար ստեղծուած են բոլոր պայմանները: Մինչեւ օրս տարբեր բուժհիմնարկներում աւելի քան 5000 սիրիահայ անվճար պոլիկլինիկական ծառայութիւններ եւ բժշկական օգնութիւն է ստացել: Յատուկ շնորհակալութիւն բժիշկներին` իրենց ամէնօրեայ աշխատանքի, հոգատարութեան համար»:

Ծրագիրի մեկնարկին առիթով ներկաներուն ողջունեց եւ գործընկեր կառոյցներուն շնորհակալութիւն յայտնեց Հայաստանի մէջ Իզմիրլեան հիմնադրամի տնօրէն Լուսինէ Գալաճեան:

Իր ողջոյնի խօսքին մէջ Իզմիրլեան բժշկական կեդրոնի տնօրէն Արմէն Չարչեան նշեց. «Այսօր հաւաքուել ենք` կեանքի կոչելու մի ծրագիր, որի իրականացումը մեր սրբազան պարտքն է` որպէս հայի, որպէս աշխարհի քաղաքացու: Որպէս բժիշկ` խոր երախտագիտութիւն եմ յայտնում բոլոր գործընկեր կառոյցներին, որոնք նախաձեռնեցին, կազմակերպեցին եւ կարողացան կեանքի կոչել այս ծրագիրը»:

Համագործակցութեան յուշագիրը ստորագրեցին Հայաստանի մէջ Իզմիրլեան հիմնադրամի տնօրէն Լուսինէ Գալաճեան, Մայր Աթոռ Սուրբ Էջմիածինի սոցիալական ծառայութեան կեդրոնի տնօրէն Տէր. Մարկոս քահանայ Մանգասարեան, ՀՀ սփիւռքի նախարարութեան աշխատակազմի ղեկավար Ֆիրդուս Զաքարեան, Իզմիրլեան բժշկական կեդրոնի տնօրէն, փրոֆ. Արմէն Չարչեան, «Հայկական բարեգործական ընդհանուր միութիւն» հիմնադրամի երեւանեան գրասենեակի տնօրէն Դալար Գազանճեան, «Սուրիահայերու հիմնախնդիրները համակարգող կեդրոն» ՀԿ-ի նախագահ Լենա Հալաճեան, «Հալէպ» հայրենակցական բարեսիրական հասարակական կազմակերպութեան փոխնախագահ, հիմնադիր անդամ Ծովիկ Պայթարեան:

«Հայաստանաբնակ կարիքաւոր սուրիահայերու բժշկական աջակցութիւն» ծրագիրին նպատակն է անվճար բժշկական օգնութիւն տրամադրել 2012 թ-էն ի վեր սուրիական պատերազմի հետեւանքով Հայաստան բնակութիւն հաստատած կարիքաւոր սուրիահայերուն: Ծրագիրը կը համաֆինանսաւորուի Իզմիրլեան հիմնադրամի եւ Մայր Աթոռ Սուրբ Էջմիածինի կողմէ: Այն պիտի իրականացնէ Իզմիրեան բժշկական կեդրոնը` շահառուներուն տրամադրելով յատուկ զեղչեր կեդրոնին մէջ գործող բոլոր բժշկական ծառայութիւններուն համար:

34 56