Հալէպի Ազգ. Քարէն Եփփէ Ճեմարանի Հիմնադրութեան 70ամեակի Հանդիսութիւն

Լոս Անճելըսի Ազգ. Քարէն Եփփէ Ճեմարանականներու ընկերակցութեան նախաձեռնութեամբ, Ճեմարանի հիմնադրութեան 70ամեակի տօնակատարութեան կազմակերպիչ յանձնախումբը հրապարակած է հետեւեալ հաղորդագրութիւնը.

«Յարգելի Ճեմարանականներ,

Լաւատեղեակ էք, թէ 2017 թուականը կը զուգադիպի Հալէպի Ազգ. Քարէն Եփփէ Ճեմարանի հիմնադրութեան 70րդ ու Լոս Անճելըսի Ազգ. Քարէն Եփփէ Ճեմարանականներու ընկերակցութեան 40րդ ամեակներուն:

Այս առթիւ, ուրախութեամբ կու գանք յայտնել, թէ ընկերակցութիւնս կեանքի կոչած է յոբելենական յատուկ յանձնախումբ մը, որպէսզի արժանավայել կերպով յիշատակէ այս զոյգ եւ պատմական թուականները:

Հալէպի Ազգ. մեր Ճեմարանի ծնունդն ու ցարդ անոր ներկայութիւնը մեծ պատիւ մըն են ոչ միայն իր այդ գաղութին, այլ նաեւ հիացմունք՝ համայն հայութեան: Ազգային դաստիարակչական կենսական գործին մէջ եօթը տասնամեակներու վրայ երկարող իր բազմօգուտ ծառայութիւնները հպարտանք կ՛առթեն մեր ազգին:

Ճեմարանը, ազգային տեւականութեան ի խնդիր լոյս եւ գիտութիւն, ոգի եւ հայութիւն ներշնչող այն մեծ կրթարանն է, որուն շրջանաւարտները, իրենց ամբողջ կեանքի տեւողութեան զայն դարձուցին իրենց համար լուսաւոր փարոս:

Ահա թէ ինչո՛ւ նաեւ Լոս Անճելըսի մէջ, չորս տասնամեակներ առաջ ծնունդ առաւ իր անունը կրող մեր այս ընկերակցութիւնը, որպէսզի հազարաւոր մղոններ հեռու, եւ այս ափերէն, իբրեւ երախտապարտներ՝ բոլորս ալ մնանք միշտ քաջալեր, գուրգուրացող ու մանաւանդ՝ թեւ ու թիկունք կանգնող անոր բոլոր ծրագրումներու յաջողութեան աշխատանքներուն:

Արդ, Ճեմարանին եւ անոր ընկերակցութեան հայապահպան առաքելութեան ի խնդիր, մեր երախտագիտութիւնը պիտի հրապարակենք յատուկ հանդիսութեամբ՝ Կիրակի, 29 Հոկտեմբեր 2017ին, կէսօրէն ետք ժամը 5ին, Կլենտէյլի Իրանահայ միութեան սրահին մէջ: Հասցէ՝ 117 S. Louise St. Glendale, CA 91205։

Ձեռնարկը կը վայելէ հովանաւորութիւնը Արեւմտեան թեմի առաջնորդ Մուշեղ արք. Մարտիրոսեանի:

æերմապէս կը խնդրենք, որ ոչ միայն մօտէն հետեւիք մեր ծանուցումներուն, այլ նաեւ տեղեակ պահէք բոլոր հին ու նոր շրջանաւարտ թէ ոչ՝ մեր շրջանէն ներս բնակութիւն հաստատած ճեմարանականները»:

Scroll Up