Մեկնարկեց ՀՀ Սփիւռքի Նախարարութեան Աւստրալիոյ Հայ Համայնքներու Կրթամշակութային Հիմնախնդիրներու Լուծման Աջակցութեան Ծրագիրը

Աւստրալիոյ հայ համայնքներու կրթամշակութային հիմնախնդիրներու լուծման աջակցութեան ծրագիրի ծիրէն ներս Սիտնէյի ‹Norths› դահլիճին մէջ տեղի ունեցաւ ՀՀ անկախութեան 22-ամեակին նուիրուած համերգային ծրագիր:

ՀՀ սփիւռքի նախարար Հրանոյշ Յակոբեանի ողջոյնի խօսքը` ուղղուած Աւստրալիոյ հայ համայնքին, ներկայացուց ՀՀ սփիւռքի նախարարութեան աշխատակազմի համահայկական ծրագիրներու վարչութեան մշակութային, մարմնակրթութեան եւ երիտասարդութեան ծրագիրներու բաժինի պետ Գրետա Մնացականեան:

Համերգային ծրագիրին  ելոյթ ունեցան ՀՀ վաստակաւոր արուեստագէտներ Լէյլա Սարիբեկեանն ու Արսէն Գրիգորեանը, տաղանդաշատ երգչուհի Սօնա Շահգելդեանը, երգահան, էթնոճազի անզուգական կատարող Գարիկ Սարիբէկեանը ու դաշնակահարուհի Տաթեւիկ Հայրումեանը:

Ձեռնարկին ներկայ էին Աւստրալիոյ եւ Նոր Զելանտիոյ հայոց թեմի առաջնորդ գերաշնորհ Տ. Հայկազուն եպիսկոպոս Նաջարեան, արժ. հայր Աւետիս Համբարձումեան, Հայ Աւետարանական եկեղեցւոյ հովիւ Վերապատուելի Յակոբ Սարգիսեան, Հայ կաթողիկէ եկեղեցւոյ հովիւ գերաշնորհ հայր Բարսեղ
Սուսանեան, Բազմամշակութային եւ փոխյարաբերութեան յանձնախումբի նախագահ
Ստեփան Քրքեաշարեան, Լեռնային Ղարաբաղի մշտական ներկայացուցիչ Վարուժան Իսկենտէրեան, Ռայտի քաղաքապետարանի խորհուրդի անդամ Սարգիս Եդելեան, համայնքի եկեղեցիներու, կուսակցութիւններու եւ կազմակերպութիւններու ներկայացուցիչներ: Երեկոն ընթացաւ չափազանց ջերմ մթնոլորտի մէջ` անսահման ոգեւորութիւն եւ յուզմունք պարգեւելով հանդիսատեսին` շարունակուելով  նախատեսուածէն մէկ ժամ աւելի:

ծրագիրն աւարտեց գերաշնորհ Տ. Հայկազուն եպիսկոպոս Նաջարեանի օրհնանքի եւ բարեմաղթանքի խօսքով: Ան շնորհակալութիւն յայտնեց ՀՀ սփիւռքի նախարարութեան նման նախաձեռնութեան համար` գնահատելով այն որպէս աննախադէպ ձեռնարկ, շնորհաւորեց կատարողներուն` փայլուն ելոյթի եւ ներկաներուն` այսչափ ոգեւորութիւն պարգեւելու համար:

Յաջորդ համերգը տեղի կ’ունենայ նոյեմբեր 30-ին Մելպուռն քաղաքին մէջ:

Գ. Մնացականեան, Աւստրալիա, Սիտնէյ

Scroll Up