«Արի Տուն-2017». Մենք Պատրաստակամութիւն Կը Յայտնենք Միշտ Սիրով Ընդունելու Անոնց Եւ Ըսելու` Բարո՛վ Եկած Ես Հայրենիք, Զաւա՛կս». Նունէ Մովսիսեան

Ամիսներ անց պիտի մեկնարկէ «Արի տուն-2017»-ը, որուն ծիրէն ներս «Հայերն այսօր»-ը պարբերաբար հարցազրոյցներ  կ´ունենայ նախորդ տարիներուն հիւրընկալ  քաղաքներու, մարզերու, գիւղերու, տարբեր համայնքներու եւ ընտանիքներու ներկայացուրցիչներուն  հետ, որոնք սիրով պատրաստակամութիւն  յայտնած են` այս տարի եւս ընդունելու մեր սփիւռքահայ երեխաներուն: Անոնցմէ մէկուն` Սփիւռքի նախարարութեան լաւագոյն բարեկամներէն Արագածոտնի մարզպետի տեղակալ Նունէ Մովսիսեանի հետ ունեցած հարցազրոյցին ընթացքին, այս ալ որերորդ անգամ, համոզուեցայ, որ հայ կինը, հայ մայրն իր մայրական զգացումներով էապէս կը տարբերի միւս բոլոր ազգերու մայրերէն:

Տիկի՛ն Մովսիսեան, քանի որ  այսօրուան հանդիպում-հաւաքի առիթը «Արի տուն» ծրագիրն էր, ուստի մեր զրոյցը սկսինք հէնց  ատկէ. ինչպէ՞ս կը գնահատէք ծրագիրը:

– Նախ` Ձեր հարցը ի պաշտօնէ կ´ընդունիմ` որպէս մարզպետի տեղակալ, ապա` որպէս մայր, որպէս հայ կին. Իւրաքանչիւր  մայր տուն կանչող է, տուն բերող եւ ի զուր չէ, որ կ´ըսենք` Մայր հայրենիք, Մայրենի լեզու…ինչ կը վերաբերի ծրագիրին, հրաշալի՛ մտածուած է եւ արդէն քանի՜ տարի է, որ կու տայ ցանկալի արդիւնքներ:  Ճակատագիրի բերումով Սփիւռքի մէջ ապրող երեխաները թո՛ղ այս ծրագիրի ծիրէն ներս տուն` Հայաստան գան, տեսնեն ու ճանչնան Հայրենիքը, զգան  Հայրենիքի ջերմութիւնը, յետագային շէնացնեն իրենց տունը, ամրացնեն այդ տան հիմքերը, դառնան  հզօր սիւներ: Հայկական հիւրընկալ ընտանիքի իւրաքանչիւր  կին կրնայ իր պատրաստած կերակուրներով, իր նիստուկացով, իր բարեհամբոյր վերաբերմունքով, ջերմութեամբ ցոյց տալ հայ կնոջ օճախապահպան էութիւնը:

 Մեր սփիւռքահայ երեխաները Հայրենիքի մէջ հիւր չեն, անոնք այս պահուն պարզապէս դուրսը ապրող երեխաներ են, որոնք պէտք է վստահաբար իմանան, որ Հայաստանի մէջ շատ ընտանիքներ կան, որոնց դռները որեւէ ատեն կրնան թակել եւ  մտնել` կարծես հարազատի տուն: Արագածոտնի մարզի 114 համայնքներէն իւրաքանչիւրին մէջ կրնանք սրտանց ընդունիլ մեր սփիւռքահայ երեխաները: Ճիշդ է, ծրագիրով ընտրուած են Երեւանին աւելի մօտ գտնուող համայնքներ, սակայն վստահաբար կրնամ ըսել, որ Արագածոտնի որեւէ  տարածքի` Արագածի, Աշտարակի, Թալինի թէ` Ապարանի, միեւնոյնն է, մեր ժողովուրդը հիւրընկալ է ու ջերմ:

Յարգարժա՛ն հայուհի, յիրաւի, անկեղծ ու ջերմ են Ձեր  խօսքերը. ըսէք, խնդրեմ` Ձեր տան մէջ հիւրընկալուած երեխաներ եղա՞ծ են:

-Այո՛, եղած են. այս պահուն կարօտով կը յիշեմ անոնց: Ես երեք երեխայ ունիմ, որոնք,  հետս միասին, սիրով  ընդունած են Թուրքմէնստանէն եկած Իլոնան, որ հրաշալի ընկերութիւն ըրաւ իմ աղջիկներուս հետ, նոյնպիսի ջերմութեամբ  ընդունած ենք   եւ  այժմ ես կարօտով կը յիշեմ Վրաստանէն եկած Արթուրն ու Արմէնը: Այսօր տեղեկացայ, որ ապրիլին  երեխաներ  պիտի գան Ֆրանսայէն. ես պատրաստ եմ անոնց հիւրընկալելու մեր տան մէջ: Իմ աղջիկս Աշտարակի Պերճ Պռոշեանի անուան դպրոցին մէջ ֆրանսերէնի եւ անգլերէնի ուսուցչուհի է, ա՛ն ալ կրնայ իր մասնագիտական տեսանկիւնէն օգտակար ըլլալ սփիւռքահայ երեխաներուն: Մենք պատրաստակամութիւն կը յայտնենք` միշտ ընդունելու անոնց եւ ըսելու` բարո՛վ  եկած ես, զաւա՛կս:

Տիկի՛ն Մովսիսեան, Ձեր նկատառումներով ի՞նչ կը պակսի դուրսէն եկած մեր երեխաներուն:

-Հիմնականին մէջ շփման պակաս ունին: Հայաստանի մէջ անոնք կրնան իւրաքանչիւրին   հետ շփուիլ ու զրուցել, որեւէ դուռ թակել ու ներս մտնել, գիտեն, որ այստեղ իրենց պաղ հայեացքով, պաղ վերաբերմունքով չեն դիմաւորեր: Անոնք ջերմութեան պակաս ունին, որ կը գտնեն Հայրենիքի մէջ:

Ձեր մարզէն ի՞նչ կը տանին իրենց հետ մեր սփիւռքահայ երեխաները:

-Ինչպէս գիտէք, մեր մարզին մէջ շատ են պատմամշակութային  յուշարձանները, տեսարժան վայրերը, դամբարանադաշտերը, նշանաւոր կամուրջները, Կիկլոպեան ամրոցները, բերդերը, եւ  մէկ այցելութեամբ,  քանի մը օրերու ընթացքին անոնք  չեն հասցներ  տեսնել այդ ամէնը: Լաւ կ´ըլլայ, որ անոնց հնարաւորութիւն ընձեռուի  անգամ մը եւս մասնակցիլ ծրագիրին, քանի որ առեղծուածներով լի է ոչ միայն մեր մարզը այլեւ` ամբողջ Հայաստանը: Մշակոյթին ու պատմութեան ծանօթանալը նոյնքան կարեւոր է, որքան` հայոց լեզուն սորվիլը, հայեցի դաստիարակութիւն ստանալը. մշակոյթը պակաս դաստիարակութիւն չէ:

Տիկի՛ն Մովսիսեան, շնորհակալութիւ՛ն գեղեցիկ հայերէնով տուած հանգամանալից  հարցազրոյցին համար:

Կարինէ Աւագեան

%d5%b6%d5%b8%d6%82%d5%b6%d5%a5

Scroll Up