Սփիւռքի Նախարարը Մասնակցեցաւ Երեւանի Թիւ 1 Համաբուժարանի Վերանորոգուած Շէնքի Բացման Արարողութեան

img_8124

Մարտ 3-ին ՀՀ սփիւռքի նախարար Հրանոյշ Յակոբեան մասնակցեցաւ Գերմանիոյ հայ գործարարներու միութեան եւ «Արման Տէրտէրեան» հիմնադրամի հովանաւորութեամբ Երեւանի թիւ 1 համաբուժարանի վերանորոգուած շէնքի բացման պաշտօնական արարողութեան:

Բացման արարողութեան կը մասնակցէին նաեւ Գերմանիոյ հայ գործարարներու միութեան նախագահ Մուրատ Աքիւզը, Գերմանիոյ մէջ ՀՀ արտակարգ եւ լիազօր դեսպան Աշոտ Սմբատեաը, Երեւանի փոխքաղաքապետ Դաւիթ Օհանեանը, ՀՀ առողջապահութեան փոխնախարար Սերգէյ Խաչատրեանը, ԵՊՀ Աստուածաբանութեան բաժանմունքի տնօրէն  Տէր Անոյշաւան եպիսկոպոս Ժամկոչեանը, բուժարանի աշխատակիցները եւ այլ հիւրեր:

Կարեւոր համարելով Հայաստանի մէջ սփիւռքահայերու ներդրումային ծրագիրներ իրականացելու անհրաժեշտութիւնը` նախարարը բարձր գնահատեց Գերմանիոյ հայ գործարարներու միութեան կողմէ Հայրենիքի զարգացման ուղղութեամբ տարուող աշխատանքները: Ան մասնաւորապէս ըսաւ. «Շնորհակալ եմ Սփիւռքի մեր հայրենակիցներին, ովքեր այսօր Հայաստանում ներդրումներ են կատարում, յատկապէս` Գերմանիայի հայ գործարարների միութեանը: Ես շատ ուրախ եմ, որ սփիւռքահայերը Հայաստանում  միշտ այնտեղ են, որտեղ նրանց կարիքը զգացւում է` կրթութեան, առողջապահութեան, մշակոյթի եւ այլ ոլորտներում: Շնորհաւորում եմ վերանորոգուած հիանալի բժշկական հաստատութեան վերաբացման առիթով»:

Գերմանիոյ հայ գործարարներու միութեան նախագահ Մուրատ Աքիւզ իր խօսքին մէջ ըսաւ, որ Հայաստանի զարգացման մասին պէտք է իւրաքանչիւր հայ մտածէ` վստահեցնելով, որ նմանօրինակ նախաձեռնութիւնները շարունակական պէտք է ըլլան:

Երեւանի թիւ 1 համաբուժարանի տնօրէն Ռուզաննա Հայրապետեան շնորհակալութիւն յայտնեց գերմանահայ բարերարներուն` ազգանուէր  գործունէութիւն ծաւալելու համար  եւ շնորհակալագիրներ յանձնեց Գերմանիոյ հայ գործարարներու միութեան եւ անձամբ` Մուրատ Աքիւզին:

ԵՊՀ Աստուածաբանութեան բաժանմունքի տնօրէն  Տէր Անոյշաւան եպիսկոպոս Ժամկոչեան նշեց, որ ծանօթ ըլլալով Գերմանիոյ հայ գործարարներու միութեան ծաւալած տասնեօթ տարուան գործունէութեան, կրնայ փաստել` միութեան աշխատակիցները մշտապէս համայնքի կողքին են եւ Հայրենիքէն հեռու հայկական միջավայր կը ստեղծեն:

Աւարտին ՀՀ սփիւռքի նախարարը շրջայց կատարեց համաբուժարանին մէջ  եւ ծանօթացաւ կատարուած աշխատանքներուն: