Հայոց Բանակի Կազմաւորման 25-Ամեակին Նուիրուած Ձեռնարկ Պաթումի Մէջ

Յունուար 29-ին Պաթումի մէջ կայացան Հայոց բանակի կազմաւորման 25-ամեակին նուիրուած ձեռնարկներ, որուն ծիրէն ներս Սուրբ Փրկիչ եկեղեցւոյ բակին մէջ տեղակայուած խաչքարին մօտ, կիրակնօրեայ պատարագէն ետք, ՀԱԵ Վիրահայոց թեմի Աճարիոյ, Կուրիոյ եւ Իմերեթիոյ հոգեւոր հովիւ Տէր Արարատ քահանայ Գումբալեանի մատուցմամբ կատարուեցաւ հոգեհանգստեան կարգ` նուիրուած Հայոց բանակի կազմաւորման, Արցախեան ազատագրական պայքարի տարիներուն եւ հայոց սահմաններու պաշտպանութեան ժամանակ զոհուած հայորդիներու յիշատակին, որուն յաջորդեց ծաղկեդրման արարողութիւն խաչքարին մօտ` ՀՀ գլխաւոր հիւպատոսութեան, հայկական համայնքային կառոյցներուն եւ անհատներուն կողմէ:

Արարողութեան Հայոց 25-ամեայ բանակի սպաներու եւ զինուորներու քաջագործութիւններուն մասին ելոյթներով հանդէս եկան Պաթումի մէջ ՀՀ գլխաւոր հիւպատոս Եղիշէ Սարգսեան, Տէր Արարատ քահանայ Գումբալեան եւ ՀՕՄ Պաթումի խումբի համակարգող Էթերի Յակոբեան:

Այնուհետեւ, Հայ եկեղեցւոյ առընթեր Ալեքսանդր Մանթաշեանի անուան կրթամշակութային կեդրոնի սրահին մէջ կայացաւ ընդունելութիւն, որուն ընթացքին տեղի ունեցան Հայոց բանակին մասին պատմող վաւերագրական նոր ֆիլմի ցուցադրութիւն եւ համերգ, ուր հայրենասիրական երգերու կատարմամբ հանդէս եկան համայնքային երգչախումբը, կրթամշակութային կեդրոնի նախակրթարանի եւ կիրակնօրեայ դպրոցի սաները:

 

Scroll Up