Սուրիահայ Պետական Երեսփոխան Դոկտ. Նորա Արիսեան Սուրիոյ ԱԳՆախարարէն կը Պահանջէ Հայոց Ցեղասպանութեան Դատապարտումը

Չորեքշաբթի, 14 դեկտեմբեր 2016-ի Սուրիոյ Խորհրդարանի նիստին, ուր ներկայ էր Սուրիոյ Արտագին գործոց նախարար Ուալիտ Մոալեմը, երեսփոխան դոկտ. Նորա Արիսեան ելոյթ ունեցաւ եւ ԱԳՆախարարէն պահանջեց Հայոց ցեղասպանութեան դատապարտումը: Դոկտ. Արիսեան, իր ելոյթին մէջ լուսարձակի տակ առաւ ՄԱԿ-ի կողմէ 9-ը դեկտեմբերին «Ցեղասպանութեան յանցագործութեան զոհերու յիշատակի եւ արժանապատուութեան, եւ այդ յանցագործութեան կանխարգիլման միջազգային օր»-ուան մասին հրապարակուած փաստաթուղթը, ինչպէս նաեւ ՄԱԿ-ի կողմէ ընդունուած 1948-ի Ցեղասպանութեան յանցագործութեան կանխարգիլման եւ պատիժի շուրջ համաձայնագիրի մասին՝ շեշտելով, որ Ցեղասպանութեան ոճրագործութեան ամենացայտուն օրինակը Հայոց ցեղասպանութիւնն է: Ան, պահանջեց յանձնառու գտնուիլ Սուրիոյ մէջ ահաբեկիչներու կողմէ գործադրուած ցեղասպանութիւններուն համար: Դոկտ. Արիսեան, պահանջեց նաեւ ցեղասպանութիւններու, մասնաւորապէս Հայոց ցեղասպանութեան դատապարտումը:

Նշենք, որ վերոնշեալ նիստին Սուրիոյ խորհրդարանի պատգամաւոր Ալան Պաքըր, որ օրեր առաջ աշխատանքային այցով կը գտնուէր Հայաստան, հանդիպում ունեցած էր Հայաստանի խորհրդարանի փոխնախագահի հետ եւ Հայոց ցեղասպանութեան հարցը հոն արծարծած: Պաքըր, իր կարգին երկրորդեց դոկտ. Արիսեանի դիմումը, եւ նոյնպէս պահանջեց Հայոց ցեղասպանութեան ճանաչումը:

Այս մասին կը յայտնէ Perio News.

Scroll Up