Նոյեմբեր 16-ին Կը Մեկնարկէ «Հայաստան» Հիմնադրամի Համաեւրոպական Հեռախօսամարաթոնը

Նոյեմբեր 16-20 «Հայաստան» հիմնադրամի Ֆրանսայի տեղական մարմինը կ’իրականացնէ իր 17-րդ համաեւրոպական հեռախօսամարաթոնը, որուն աւանդաբար կը մասնակցին նաեւ Գերմանիոյ եւ Զուիցերիոյ տեղական մարմինները: Դրամահաւաքի հասոյթը կ’ուղղուի ապրիլեան ռազմական գործողութիւններու արդիւնքով Արցախի առաւել տուժած համայնքներու վերականգնման, սուրիահայերու օգնութեան, Հայաստանի Տաւուշի մարզին մէջ իրականացուող գիւղատնտեսական ծրագիրներու շարունակական զարգացման:

Յունաստանի տեղական մարմինն ալ դրամահաւաքին կը միանայ Նոյեմբեր 19-20 Աթէնքի մէջ իրականացուելիք հեռախօսամարաթոնով եւ ստացուած հասոյթով կը համաֆինանսաւորէ Արցախի Քարին Տակ գիւղի մանկապարտէզի կառուցումը:

Հեռախօսամարաթոն 2016-ի կնքահայրն է Ֆրանսայի մէջ յայտնի լրագրող եւ հաղորդավար Նիկոս Ալակասը, կնքամայրը` ֆրանսական Revu՞e des Deux Monde՞s ամսագրի գլխաւոր խմբագիր Վալերի Թորանեանը, որոնք համախմբման եւ աշխոյժ մասնակցութեան կոչով կը դիմեն եւրոպաբնակ մեր հայրենակիցներուն: Շուրջ 600 կամաւորներ ալ Փարիզ, Լիոն, Մարսէլ եւ Թուլուզ քաղաքներէն մարաթօնի հինգ օրերուն ընթացքին հեռախօսազանգերով կը դիմեն հայ ընտանիքներուն ու կազմակերպութիւններուն` յորդորելով սատարել Արցախի, Հայաստանի ու Սուրիոյ մեր հայրենակիցներուն:

Յիշեցնենք, որ նախորդ տարուան հեռախօսամարաթօնի արդիւնքով հաւաքագրուած աւելի քան 1.3 միլիոն եւրօ գումարը ուղղուած է Հայաստանի Տաւուշի մարզին մէջ գիւղատնտեսական ծրագիրներու իրագործման, Արցախի գիւղական համայնքներուն մէջ համայնքային կեդրոններու կառուցման եւ ծանր վիճակի մէջ յայտնուած սուրիահայերու ու իրաքահայերու օժանդակութեան:
Արդէն 17 տարի է, հայկական համայնքներ ունեցող եւրոպական որոշ երկիրներ իրենց համայնքներուն մէջ հանգանակութիւնները կ’իրականացնեն դրամահաւաքի այս եղանակով, որ տարիէ տարի նոր նուիրատուներ կը ներգրաւէ եւ աւելի մեծ հասոյթ կ’ապահովէ: Ամերիկայի մայրցամաքին մէջ ալ հեռախօսամարաթօնի միջոցով  դրամահաւաքներ կ’իրականացնեն Հիմնադրամի Արժանթինի եւ Պրազիլիոյ տեղական մարմինները: Խոշոր դրամահաւաքներու բոլորաշրջանը այս տարի կ’եզրափակէ Պրազիլիոյ տեղական մարմինը` Նոյեմբեր 26-27 իրականացնելով իր հեռախօսամարաթոնը: Ուշագրաւ է, որ հեռախօսամարաթոններու կամաւորականներու շարքին կան բազմաթիւ այլազգիներ, որոնց մասնակցութիւնը արդէն իսկ կը վկայէ դրամահաւաքի աճող հեղինակութեան մասին:

Հեռուստամարաթոն 2016-ի գլխաւոր հովանաւոր – ՀԱՅԲԻԶՆԵՍԲԱՆԿ
Գործընկեր – ՀԱՅՓՈՍՏ

 

Scroll Up