ՀՀ Սփիւռքի Նախարարութիւնը Անկարելին Կարելի Դարձուց` Սուրիահայերուն Օգնելու Համար. Սագօ Արեան

Երեւանի եւ Ստեփանակերտի մէջ աւարտեցին ՀՀ սփիւռքի նախարարութեան կազմակերպած «Հայոց պետականութիւնը` միասնութեան առանցք» խորագիրով Լրագրողներու համահայկական 8-րդ համաժողովի աշխատանքները:

«Հայերն այսօր»-ի հետ զրոյցին «Արեւելք» կայքի գլխաւոր խմբագիր Սագօ Արեան ներկայացուց հայկական մամուլի դերին եւ նշանակութեան մասին իր մտորումները, ինչպէս նաեւ տեղեկացուց, թէ համաժողովին ընթացքին ինչ ելոյթով  հանդէս եկած է:

– Հայկական մամուլն այսօր հայ զինուորի կողքին է` հայ ժողովուրդի շահերն ու անվտանգութիւնը պաշտպանելու, Հայաստանի դերը Կովկասի մէջ կայունութեան ապահովման ուղղութեամբ պաշտպանելու եւ աշխարհի մէջ հայերու իրական պատկերը ցոյց տալու նպատակով: Պէտք է յատկապէս ուշադրութիւն դարձուի այն հայ լրագրողներուն, որոնք հեղինակաւոր, միջազգային ճանաչում ունեցող լրատուամիջոցներու մէջ կ’աշխատին: Անոնց գործունէութիւնը շատ կարեւոր կը համարեմ, քանի որ անոնք մեր խոնարհ հերոսներն են: Ապրիլեան պատերազմի օրերուն ալ տեսանք, թէ ինչպէս հայ լրագրողները օտար կամ հայկական ամպիոններու մէջ մեր դիրքերն ու շահերը պաշտպանելու համար ինչպիսի անվտանգութեան գօտի ստեղծեցին: Ես կ’երազեմ, որ այս համաժողովներուն մասնակցին նաեւ օտարախօս հայ լրագրողներն ու ֆոթոլրագրողները. անոնք պէտք է մեր կողքին գտնուին, քանի որ կարեւոր ներուժ են մեզի համար: Լրագրութեան մէջ հասած իրենց դիրքերուն շնորհիւ` անոնք կարեւոր եւ օգտակար գործ կրնան ընել:

Հայկական մամուլն այսօր իր ծաւալած գործունէութեամբ Հայաստան աւելի ազդեցիկ եւ հրապուրիչ երկիր կը դարձնէ, մանաւանդ` աշխարհի հայկական այն հատուածներուն մէջ, որոնք Հայաստանի մասին գրեթէ ոչինչ գիտեն:

Հայաստանեան եւ սփիւռքեան մամուլն իր աշխատանքով արտաքին աշխարհին հետ պէտք է կամուրջ ստեղծէ` ցոյց տալու համար, թէ Արցախի մէջ ռազմական գործողութիւնները սկսելուն որ կողմը  նախայարձակ կ’ըլլայ:

Միայն խմբագրականներ գրելով եւ հրապարակախօսութեամբ սահմանափակուիլ պէտք չէ. պէտք է խօսինք աշխարհի լեզուով եւ հէնց աշխարհին ըսելիք ունենանք: Այսօր ամենահզօր զէնքը աշխարհի մէջ մամուլն է` ըլլայ մէկ լուսանկարի, մէկ յօդուածի կամ տեղեկագրութեան  տեսքով:

Օրինակ, երբ ատրպէյճանցիները ապրիլեան պատերազմի օրերուն մտան Թալիշ եւ ականջները կտրելով` խաղաղ բնակիչներ սպաննեցին, մենք հինգ լեզուով այդ մասին լրատուութիւն սփռեցինք` լուսաբանելով ատրպէյճանական վայրագութիւնները եւ այն, որ ԻԼԻՊ-ը միայն Սուրիոյ մէջ չէ:

Իսկ այս համաժողովին հանդէս եկայ «Արեւելք» կայքի լրատուական փորձը հալէպահայերու դիմագրաւած տագնապներուն մասին» զեկոյցով` ներկայացնելով սուրիահայերու հիմնախնդիրներու ճշմարիտ լուսաբանման կարեւորութիւնը լրատուամիջոցներուն մէջ:

Զեկոյցիս մէջ, ի թիւս այլ հարցերու, անդրադարձայ նաեւ ՀՀ սփիւռքի նախարարութեան` Հայաստանի մէջ հաստատուած սուրիահայերուն ցուցաբերած օգնութեան պատրաստակամութեան մասին` նշելով, որ սուրիական տագնապի առաջին օրերէն, երբ Հայաստան եկող սուրիահայերուն թիւը այդքան մեծ չէր, ՀՀ սփիւռքի նախարարութիւնն ու Հալէպի հայ համայնքի դերին ու կարեւորութեան քաջածանօթ նախարար Հրանոյշ Յակոբեան անկարելին կարելի դարձուցին` սուրիահայերուն օգնելու համար:

Գէորգ Չիչեան

Scroll Up