ՀՀ Անկախութեան 25-Ամեակին Նուիրուած Ցուցահանդէս Լոս Անճելըսի ՄԷջ

Լոս Անճելըսի մէջ կը շարունակուին Հայաստանի անկախութեան 25-ամեակին նուիրուած ձեռնարկները: ՀՀ գլխաւոր հիւպատոսութեան եւ Կլենտէյլի քաղաքային խորհուրդի համատեղ ջանքերով Կլենտէյլի քաղաքապետարանի շէնքին մէջ  բացուած է «Դարաւոր Հայաստանի նորանկախ պետութիւնը» խորագիրով լուսանկարչական ցուցահանդէս: Այս մասին «Հայերն այսօր»-ը կը տեղեկանայ ԱԳՆ մամլոյ ծառայութենէն:

Ցուցահանդէսին ներկայացուած 150 լուսանկարները կը պատմեն 1990-2016թթ. ժամանակաշրջանին Հայաստանի մշակութային, տնտեսական, քաղաքական, գիտական ու հասարակական ոլորտներուն մէջ տեղի ունեցած կարեւորագոյն իրադարձութիւններուն մասին:

Բացման արարողութեան ցուցահանդէսի հեղինակ «մենք» պետական եւ ազգային արժէքներու հանրահռչակման հիմնադրամի տնօրէն Փաւել Սարգսեան նշեց, որ ձեռնարկին նպատակն է հայ եւ օտարազգի հանրութեան ներկայացնել ՀՀ անկախութեան ճանապարհը:

ՀՀ հիւպատոս Արմելլա Շաքարեան իր ելոյթին մէջ ընդգծեց, որ ՀՀ անկախութեան 25 տարիներուն ընթացքին Հայաստան-Արցախ-Սփիւռք եռամիասնութեան շնորհիւ հնարաւոր  եղած է բազմաթիւ խնդիրներ յաղթահարել ու յաջողութիւններ արձանագրել:

Կլենտէյլի քաղաքային խորհուրդի անդամ Վարդան Ղարպետեան իր խօսքին մէջ կարեւոր համարեց նման ցուցահանդէսի բացումը Կլենտէյլի մէջ, որմով քաղաքի բազմազգ բնակչութեան լրացուցիչ հնարաւորութիւն ընձեռուած է լուսանկարներու միջոցով ծանօթանալու Հայաստանի նորագոյն պատմութեան եւ հայ համայնքին:

Ձեռնարկին Արմելլա Շաքարեան շնորհակալագիր յանձնեց Վարդան Ղարպետեանին` հիւպատոսութեան հետ համագործակցելու եւ նմանատիպ ձեռնարկ կազմակերպելու հարցով օժանդակութիւն ցուցաբերելու հարցին մէջ:

Scroll Up