Աշխարհի Կանանց Մէջ Բացառի՛կ Են Հայուհիները

«Հայերն այսօր»-ի խմբագրութեան դռնէն ներս մտնող հիւրերը `բարեհամբոյր , հմայիչ տիկին մը ու անոր ուղեկցող գեղեցկուհին ինծի անծանօթ էին. հարցազրոյցի ընթացքին անգամ տիկին Ճեսիքան համեստօրէն լռեց իր հանրաճանաչ ըլլալուն մասին, եւ մեր զրոյցը հիմնականին մէջ ծաւալեցաւ անոր արմատներուն, Հայոց ցեղասպանութենէն փրկուած հարազատներուն, հայերուն ու Հայաստանին, մարդոց սոցիալական վիճակին, Երեւանի, Անկախութեան հռչակման 25-ամեակի տօնակատարութեան մասին, իսկ յետոյ… մնացեալը` հարցազրոյցէն ետք:

Բարո՛վ  եկած էք Հայաստան եւ Սփիւռքի նախարարութիւն` հայո՛ւ տուն: Տիկի՛ն Ճեսիքա, զրոյցը սկսինք Ձեր արմատներէն. ուրկէ՞ են Ձեր նախնիները, ծնողները:

-Իմ ամբողջական անունս Ժասմին-Ճեսիքա Վարդուղեան է, արմատներս Արեւմտեան  Հայաստանէն են, իմ ծնողներս Որրֆայէն եղած են: Մեծ հայրս պատմած է, թէ ինչպէս  ջարդի ժամանակ կորսնցուցած են շատ հարազատներ, մայրս ալ ջարդի ժամանակ կորսնցուցած է իր երկու քոյրերը, մօրս կողմէ մնացած է միայն անոր հայրը. անոնք Պուրսայի կողմերը աշխատած  են մետաքսագործութեամբ, լաւ ապրուստ  ունեցած են. ընդհանրապէս, Պատմական Հայրենիքի մէջ մեր նախնիները շատ լաւ  ապրած են, շատ աշխատասէր եւ  հարուստ  եղած են: Դառն ու դաժան ճակատագիր  բաժին հասած է մեր նախնիներուն. ցիրուցան  եղած են աշխարհով մէկ, եւ  անոնց սերունդները  կազմած են այսօրուան Սփիւռքը: Մեծ  մօրս  երկու քոյրերը  կ’երթան  Փարիզ, մեծ հայրս  ու  մեծ մայրս կը հաստատուին Ռումանիա, որն այն ժամանակ շատ հարուստ երկիր  եղած է, ուր հայերուն շատ լաւ  ընդունած են: Հայրս  կօշիկ ձեւաւորող էր, գործարան ունէր, մենք շատ գեղեցիկ տուն ունէինք, լաւ ապրուստի տէր էինք: 1957- 58-ին այն մարդիկ, որոնք ռումանական փաստաթուղթ, անձնագիր չունէին, անոնց կը տեղահանէին: Ձգելով մեր հարստութիւնը, մեր գեղեցիկ տունը` հայրս, առանց որեւէ ինչքի, դուրս եկաւ իր տունէն…այսօրուան պէս կը յիշեմ մեր գեղեցիկ տունը, որ  բոլորը շատ կը հաւնէին, եւ տեղի ամենամեծ բանտի տնօրէնը գնեց զայն:  Մենք   քանի մը տարի ապրեցանք Պէյրութ. հայրս պալէի ճկուն կօշիկներ կը նախագծէր, որուն շնորհիւ բաւականին դրամ վաստակեց ու այդ միջոցով տեղափոխուեցանք Ամերիկա` Լոս Անճելըս:  Երկու տարի ապրեցանք  Bevely Hills-ի մէջ, հայրս 16-18 ժամ կ’աշխատէր, երեք երեխայ էինք ընտանիքին մէջ, ապրի՛լ  պէտք էր: Թէեւ  մեծ չէի, սակայն ես ալ կ’աշխատէի. 1964-ին ընդունուած եմ Քալիֆորնիոյ համալսարան, զուգահեռաբար սորված եմ անգլերէն, ընդունուած եմ  Beverly Hills գտնուող գեղեցկութեան սրահ, 3 տարի զբաղուելով վարսավիրութեամբ` սկսայ ուսումնասիրել եղունգներու խնամքը, վերականգնողական աշխատանքները, խորացայ այդ ոլորտին մէջ, 1969-ին բացի իմ առաջին փոքրիկ սրահս…

Տիկի՛ն  Ճեսիքա, դժուար է Ձեզմէ լսել Ձե՛ր մասին…ձեզի ուղեկցող Սոնան կը ժպտի. եւ, այնուամենայնիւ, կ’ըսէ՞ք, թէ որն է Ձեր գործունէութեան ոլորտը`  բարեգործութիւնը՞, հասարակական աշխատանքը՞, այսքան տարի ինչո՞վ  զբաղած էք Լոս Անճելըսի մէջ…

-Լոս Անճելըսի մէջ հայերուն կ’օգնեմ աշխատանքի հարցերով, այստեղ  ամէն ամիս  կ’օգնեմ 8 փոքրիկներու եւ շուրջ 15 տարի  ամէն  ամիս նիւթական աջակցութիւն  կը ցուցաբերեմ   ընտանիքի մը, AYVA-ի` հայ կանանց  խորհուրդի անդամ եմ, անոնց հետ կ’աշխատիմ, նաեւ անոնց կ’օգնեմ տարիներ շարունակ…

Այսինքն` բարեգործութիւն է  Ձեր ըրած աշխատանքը…

-Այո՛, բարեգործութիւնը, բայց շատ չեմ սիրեր խօսիլ այդ մասին. ես կ’ուզեմ, որ երիտասարդները մնան Հայաստան, լաւ կրթութիւն ստանան, չերթան Հայաստանէն: Գիտէք` որքա՜ն կը սիրեմ հայկական հին երգերը, մեր մշակոյթը, այն ամէնը, որ կը խօսի հայերէն, կը խօսի իմ սրտիս, իմ հոգիիս հետ, կ’ուզեմ օգտակար ըլլալ իմ ժողովուրդիս:

Առաջիկային ի՞նչ ծրագիրներ ունիք:

-Օ՜… ես  կ’ուզեմ, որ Հայաստանի մէջ երեխաները արհեստ սորվին, ոչ բոլորը կրնան ընդունուիլ բարձրագոյն հաստատութիւններ, եւ ես կ’ուզեմ կազմակերպել, որպէսզի  երեխաները  անվճար հիմունքներով արհեստ սորվին:

Տիկի՛ն  Ճեսիքա,  քանի՞ անգամ եկած էք Հայրենիք եւ  ինչպիսի՞ զգացումներ ունեցաք  Ձեր առաջին այցելութեան ժամանակ:

-Սա իմ 8-րդ այցելութիւնս է Հայաստան. երբ 15 տարի  առաջ ես առաջին անգամ եկայ Հայաստան, իջայ օդանաւէն, 7-8 օր մնացի եւ անընդհատ կ’արտասուէի, շատ ցաւալի էր, այսօր վիճակը  բաւականին տարբեր է. կ’ուզեմ, որ Հայաստանն ու հայերը շատ լաւ ապրին, անոնք արժանի են ատոր:

Ին՞չ է Հայրենիքը Ձեզի համար…

-Հայրենիքը  իմ հողս է, այն ինծի ու՛ժ, կարողութիւ՛ն կու տայ. հայերը իւրայատուկ, տաղանդաւոր մարդիկ են, ես հպարտ եմ, որ հայուհի եմ:

Ահա այսպիսի  ոգեւորող, զգայացունց  աւարտ ունեցաւ մեր զրոյցը, որուն ընթացքին տիկին Ճեսիքան այդպէս ալ համեստօրէն լռեց ու չըսաւ, որ ինք  JESSIKA ամերիկեան ապրանքանիշի հիմնադիրն է եւ այն առաջին կինը, որ  Beverly  Hills-ի մէջ հիմնած է խնամքի նեղ մասնագիտացուած կեդրոն, որուն համար «The New York Times»  ամսագիրը զինք շնորհած  է «First Lady of nails» տիտղոսը, որ դեռեւս 1969- ին ինք բացած է աշխարհի մէջ եղունգներու առաջին մասնագիտացուած սրահը, որ անոր այցելուները եղած են աշխարհաճանաչ  անձիք`Ռոնալտ Ռէյկընի տիկինը, Հիլարի Քլինթոնը եւ ֆիլմի ու երգարուեստի համաշխարհային  ճանաչում ունեցող աստղեր, որ 1986-ին ինք սկսած է սեփական ապրանքանիշի հեռուստատեսային վաճառք կազմակերպել` իր ապրանքատեսականին արտահանելով Ճափոն, եւրոպական երկիրներ, իսկ 1990-ին նուաճած է ողջ աշխարհը, որ ֆրանսական French  մատնայարդարման գաղափարն ու այն իրականութիւն դարձնելը եւս իր մենաշնորհն  էփաստերը այնքա՜ն խօսուն են, որ մեզի կը մնայ միայն հիանալ ու հպարտանալ այսպիսի հայուհիներով ու մաղթել, որ Ժասմին –Ճեսիքա Վարդուղեանի բոլոր երազանքներն ու հայանպաստ ծրագիրները իրականութիւն դառնան եւ կրկին ըսել, որ աշխարհի կանանց մէջ բացառի՛կ են ստեղծարար հայուհիները:

 Կարինէ Աւագեան

Scroll Up