Սփիւռքի Նախարարը Ընդունեց Ամերիկահայ Նկարիչ Դանիէլ Վարուժան Հեճինեանը

Սեպտեմբեր 6-ին ՀՀ սփիւռքի նախարար Հրանոյշ Յակոբեան ընդունեց Հայաստանի եւ Արցախի անկախութեան 25-ամեակի տօնակատարութիւններուն մասնակցելու նպատակով Հայաստանի մէջ գտնուող ամերիկահայ նկարիչ Դանիէլ Վարուժան Հեճինեանը:

Ջերմօրէն ողջունելով հիւրը` նախարարը շնորհակալութիւն յայտնեց սփիւռքահայ արուեստագէտին Հայրենիքին սատարելու, անոր զարգացման առաջամարտիկը ըլլալու սկզբունքային ու գործուն դիրքորոշման եւ այն ազգաշահ ծրագիրներուն համար, որ ան կ’իրականացնէ Ամերիկայի Միացեալ Նահանգներուն մէջ: Հրանոյշ Յակոբեան իր գոհունակութիւնը յայտնեց 1996 թուականէն առ այսօր Մասաչուսէթս նահանգի տարբեր քաղաքներու բանուկ հատուածներուն մէջ Հայոց ցեղասպանութիւնը ոգեկոչող իր մեծադիր ցուցապաստառները ներկայացնելու համար: Այս տարի Դանիէլ Վարուժան Հեճինեան ցուցադրած է 101 աշխատանք` անընդհատ, որպէս անհերքելի պատմական փաստ հանրութեան յիշեցնելով Հայոց ցեղասպանութեան ողջ իրողութիւնը, կոչ ընելով ճանչնալու զայն, ոճրագործը  դատապարտելու եւ հատուցում պահանջելու:

Նախարարը նշեց. «Սիրելի Դանիէլ Վարուժան, անչափ ուրախ եմ, որ լինելով Հայոց ցեղասպանութիւնը վերապրած եւ Սիրիայում օթեւան գտած հայ ընտանիքի զաւակ, դու մանկուց ականջալուր ես եղել կոտորածի դաժան պատմութիւններին եւ քո ծնողների աչքերով տեսել այն, դա են վկայում քո «Մօր ձեռքերը», «Մայր խաչքար» աշխատանքները, որոնք նուիրուած են Հայոց ցեղասպանութեան մէկուկէս միլիոն նահատակների յիշատակին: Ի զուր չէ, որ դու կրում ես մեծ նահատակ բանաստեղծի անունը` եթէ Դանիէլ Վարուժանն իր եղէգնեայ գրչով ներկայացրեց Հայոց վիշտն ու իղձերը, ապա դու  դա անում ես վրձնով»:

Սփիւռքահայ արուեստագէտը շնորհակալութիւն յայտնեց ջերմ ընդունելութեան համար եւ հաւաստիացուց, որ տօնական մթնոլորտէն եւ Հայաստան աշխարհէն ստացած լիցքերը նոր ստեղծագործական մտայղացումներու, նոր ձեռնարկներ կեանքի կոչելու ազդակ կը դառնան:

Scroll Up